خانای خۆش نوویس باش حەکاکان
تەعریف کونەندەی داستان بە داستان
بشین بەسەروەخت کار شازادە
چون بەجا گوزاشت ئەو زەوق و بادە
بارخانە و بەند قەتار کەردن بار
بەساعەت سەعد بەرئامان نەشار
شاهان سوار بین بەوەسواسەوە
بەو خواجە و کەنیز توحفەی خاسەوە
بەو ناقەی خۆشرەو کەژاوەی یاران
بەو دەستەی غوڵام شیرین سەواران
بەو سەدای موترێب کزەی سازەوە
کەنیز و غوڵام دەم بەڕازەوە
ئیشارە بەناز مەکەردن بەهەم
مەڕانان بەناز ئەسپ خۆش قەدەم
خێزا بۆق کووس کەڕەنای شادی
چاوشان وە بانگ دەوڵەت زیادی
ماه زەڕئەفشان شای نۆش ئافەرین
پادان بە ڕێکاب سوار بین وە زین
سوار بی خورشید نازدار دڵتەنگ
زوڵف کەرد بەبەیداخ شەڕ ئاشووب جەنگ
زیڵەی بانگ بەرز غەوغا کەفت نەشار
خرۆشا بەهەم مەخلۆق بازار
سەدای زیل و بەم زەنگ جامازە
ڕەشمەی سەر بەزەڕ جیاز تازە
سەمەندان بەڕەخت تەڵاکارەوە
مەکێشان خرۆش جە بازاڕەوە
هونەی زڕەی ڕەخت تازە سەمەندان
مەسەندن دوو گۆش جە دانش مەندان
ئەهل شار یەکسەر وە هەم خرۆشان
نە زیر پادا چەند توفڵ بێ گیان
چل هەزار سوار تەمام خانزادە
چابک سواران فەرەنگی زادە
خاتوونەی پەری شای نۆش ئافەرین
ماه زەڕئەفشان زوڵفان عەنبەرین
خورشید هەم وە بەرگ تەڵاکارەوە
بەو تورمەی زەڕباف شەدەی لارەوە
بەی شۆخ و ڕەندی نەشار شین وە بەر
هەریەک نە شیرین ئەرمەن شیرینتەر
مەدرەوشانەوە نەرووی خوان زین
شازادە خوسرەو خورشید چون شیرین
خورشید نە هیجران سەر نە سەودا و دەرد
تەقالا چەنی خەیاڵان مەکەرد
مەشین بەراوە سوحبەت مەداشتن
بەڵێ نەدەروون توخم غەم کاشتن
تا دوو فەرسەخی موشایەعەت کەرد
جەو دما خورشید هیمەت خواهی کەرد
خێزا جە لەشکەر بانگ واوەیلا
بەو تەور ڕەفیقان جەهەم بین جیا
خورشید عاڵەم شای شیرین چارە
گێڵاوە بەسەد داد و پەژارە
شی بە تۆی حەرەم نیشت نەپەردەی غەم
نە تەخت شاهی یاوا بە ماتەم
نە داغ هیجران دووریی شازادە
تەرک کەرد خۆراک پیاڵە و بادە
* جەو تەرەف یاران مەنزڵ بوما بین
بەمەکان موڵک مەغریب جوویا بین
شین بە کۆ و سارا گردشان قەرار
تا دوو فەرسەخیی نەزدیک بین نە شار
خەیمە و بارەگا کەردشان بەرپا
تا ئاسوودە بین گشت نەرەنج ڕا
جەو دەم خاتوونە خاڵان لاجوەرد
فەرهەنگ دێو بەدەست شازادە سپەرد
هیمەت خواهی کەرد پەرواز کەرد دەر دەم
تا شی بە گوڵزار گوڵباغچەی ئیرەم
شازادەی چینی دڵ پڕ ڕاز و غەم
ئاما وە یادش خورشید عاڵەم
خان محەمەد دانا تەڵەب کەرد وە پێش
واتش ئەی دڵسۆز یار جەفاکێش
ئارەزووی دیدار خورشیدم کەردەن
هیجران دووریش زۆرم ئاوەردەن
مەبۆ من ئیمشەو مەیل خاو نەکەم
تا مەشووم بەلای خورشید عاڵەم
ساتێ بوینووم وەرتەر جە مەرگم
بەل ئەفسوردە بۆ زامان جەرگم
مەبۆ تۆ نەی جا تۆفیق پشتت بۆ
هەمیشە ئاگات جە کار وێت بۆ
خان محەمەد واتش ئەی شێر خۆش خۆ
عەرزم هەر ئێدەن ویر دمات بۆ
جەنەو شازادە ئاما بە گوفتار
وات ئەی خان محەمەد یار وەفادار
بەعەزم لوان بەرنەشی نەی جا
ئەی خەیمە و خەرگاه بدارە ئاگا
شازادەی مەلوول بەخاتر پەشێو
دەرسات سوار بی وە فەرهەنگ دێو
نیشت نەڕووی هەوا دێو خۆش ئاهەنگ
ڕوو کەردش نەشار ناحیەی فەرەنگ
#خانای قوبادی# [1]