باخچێوە بېگەرد
نویستەی: میرزا ئۆلقاڎرو پاوەی
بەشۍ ویس و حۆتەمە
میرزا ئۆلقاڎرو پاوەی ئەچی بەشەنە باس جە سەروەختو فېرکەردەی کشتوکېیاری و هیتیاری کەرۊن جە لایەنو جوبرەئیلیۆ پەی حەزرەتو ئاڎەمی:
جوبرەئیل تۊمو خەلەیش یاونا بە دەسو ئاڎەمی، فېرش کەرد چەنی زەمین بکاڵۊو تۊمەکەی بشانۊ، ئیتر حەزرەتو ئاڎەمی سەحەر دمای نماو ساعبی تەشریفش بەرد پەی هەرمانۍ و کاڵای زەمینی.
دیسان جیبریل، موراجەعەت کەرد
بەرزی ئەساسەی، جفت وە کاو ئاوەرد
وات: یە ئەو توخمەن، تۊ مەیلت پېش بۍ
ڕاسەن، خوڎاوەند، تەقدیری وېش بۍ
بەڵام ئەی دانە، وە بۍ بەهانە
فەرما، ئەی دانە، نە خاک بشانە
جە دمای چەندێ، بەرمەبۊ، جە خار
ماوەرۊ پەرېت، دانە، بە خەروار
جە ڕاهانی چۊڵ، زاتت هەر ئېدەن
تا مەحشەر خوراک، ئەولادت ئیدەن
یەک ڕۊ سوبح سەحەر،، جەنابی ئادەم
بابای سەبک ڕوح، موبارەک قەدەم
جە دمای تاعەت، یەکتای یەگانە
بەرئاما وە بەر، جە خەڵوەت خانە
وېنەی فەلاحان، مەیلی سارا کەرد
بەزر، نېڵەگا و، هەم گاواسن بەرد
جفت بەست، ئەو زەمین، سەحرای کاڵا
توخمش پاشنا، ماڵەش پېش ماڵا
بەعزێ تەر زەمین، زیاد هەم کاڵاش
پەی کاڵ و مەکاڵ، ماباقی ساڵا
ماهی مەکەرد گاو، گاو پەڕتاف مەوەرد
بە جارێ دەشتێ، دیمام دیم مەکەرد
جەی کۊ، هېڵ مەوەرد، وە دەوانی دەو
جە ئەو کۊ نەرمی، گاوش مەدا هەو
ئان یەک سەعات، وەیتەور جۊتش کەرد
جای هەزار فەللاح، بڕێ شۊم و وەرد
حەوا، هەم دایېم، تەماشاش مەکەرد
هەر ساتێ سەڎ جار، مەرحەباش مەکەرد
غەرەز، مەزرەعە، ئەو زەید و ماوا
شش ساعەت، حاسڵ، تخمش پەی یاوا
ئاڎەم جە مەزروع، تەعجیل کەرد پەی نان
درووناش وە داس، نیاش وە خەرمان
جەو دما، زەمین، خاری خاتر خەم
وە ئاوازی بەرز، واتش: یا ئاڎەم
جەفای ڕۊزگار، جەرگم تاونان
توخمی بەزری تۊم، درەنگ یاونان
گلەییت نەبۊ لېم، جەستەم پەڕ دەردەن
ئەوەند، فەلاحان، بازیی، پېم کەردەن
نەمەندەن قووەی هاز و ئەندامم
زوخاو مەشانۊ، زۊخی زامانم
هەزار هەزار کەس، چێوەڵتەر ساڵان
ئامان وېنەی من، ئەی جاگە کاڵان
وەرنەو یەک سەعات، وە مەتبوعی تۊ
پېم مەیاونای، ئەی مەزروعی تۊ
بەڵام چوون دنیا، خەیلێ ویەردەن
دەوران وە مەخلووق، چەند باریش کەردەن
من هەم، جە تەقسیر، وەیتەورم دیەن
مەعلوومەن، تەقسیر، خیلافش نېیەن
هەر جە عەسری جان، تا عەسری ئاڎەم
شەست هەزار ساڵەن، بۍ زیاڎ و کەم
یەکسەر ویەردەن، دەورانی فانی
زاتی بۍ زەواڵ، هەر وېت مەعانی
جەو دما ئاڎەم، شای فریشتە خۊ
هۊڵە بەست وە شاڎ، خەرمانش کەرد کۊ
جە شنۊی شەماڵ، سۊزەی بای موراد
شەندا وە کارا، گردش دا وە باد
وەختێ وە سەرەن، تەمام کەردش پاک
شوکر کەرد وە زات، فەردی تەنیای تاک
جە سېڕڕی تەقدیر، یەکتای یەگانە
هەر یەک دانەش بیی، بە هەزار دانە
ئەم جار بە شاڎی، کېشاشان بە ماڵ
هەم چەنی، حەوا، شای شیرین جەماڵ.
[1]