باخچێوە بېگەرد
نویستەی: میرزا ئۆلقاڎرو پاوەی
بەشۍ: سی و پەنجەمە

میرزا ئۆلقاڎری پاوەیی چی بەشېنە سەرئاماو قەوم و حەزرەتو (نووح)ی باسکەرۊن، کە ئیمانشان پەنە نارد و لاساریېشا کەردۍ، گۊششا نەڎا بە مۊچیاریەکا حەزرەتو نووحی، دمای بۍ فەرمانیەکاشا و دەسکەردەی بە خرابەو بەڎ ڕفتاری، جوبرەئیل تەشریفش ئاما، هەواڵشدا نووحی کە مەجمەعو ئاوا خەریکەن و نزیکەن جەمۍ بان، ئیتر توفان نزیکەن.
قەولی ئەلخەنناس گرتشان، نە گۊش
نەفعی، وەعزی، نووح، کەردەن فەرامۊش
خوسووس، دوو نەفەر، فرزەندانی وېش
(جاروب) و (کەنعان) ، گومڕای کینەکېش
بەڎتەرین قەوم، زومرەی ذیی ڕۊح بین
ئینکار و مونکەر، فەرموودەی نووح بین
یەکێ مەعاریف، قەومی، بەڎ ئەندېش
جە حوزووری نووح، پا نیا، وە پېش
ئاغاز کەرد وە قەوم، واتش ئەی یاران
ئی شەخسە، چن ساڵ، جە ڕۊژگاران
بادی فەراسەت، ساحریی وەردەن
وە سیحرش عالەم، موسسەخەر، کەردەن
دەخیل، سەڎ دەخیل، زینهار، سەڎ زینهار
هەرگیز وە حەرفش، نەکەن، ئیعتیبار
دەس بەرد، بەعزێ خاک، وە بۍ چوون و چەند
وە ڕووی موبارەک، حەزرەت، نووح شەند
حەزرەت، جەی سەدەد، واقیعەیێ حاڵ
هانا، بەرد، وە زات، حەیی بۍ زەواڵ
نیدا، ئاما، وات: بورهان منم
میفتاحیلقلووب، بەندەگان منم
حەققی مەزڵوومان، تاعەت گوزاران
مەبۊ، دەریافت بۊ، جە، ستەم کاران
هەنی دەردی دڵ، وېت مەکەر، ئیزهار
یەکسەر، جە لای من کەشفەن ئەفکار
مەشهوور و مەعرووف، گرد حاڵ و قاڵەن
ئەدنا، تەحەممل، خوڎا، چل ساڵەن
بېتاقەت مەبەر، عاجزەم لېشان
نزیکەن، تۊفان، خېزیۊ پەرېشان
جە لاوی تۊفان، گرد، نگوونسار بان
نە لایی دوزەخ، گرد گرفتار بان
ئەوەڵ جار، (قەحتی)، نازڵ کەرد پەیشان
مار زەهرش مەکەرد، نە جامی مەیشان
قووەی تەوالید، نەمەند، جە لاشان
ڕەسمی تەناسول، بڕیا، نە جاشان
تا یەک ڕۊ، دیسان، هەم ڕۊحەلئەمین
تەشریفش ئاوەرد، وە ڕووی سەرزەمین
سەلامی سانیع، ئیجادی زیڕۊح
دەردەم، یاونا، وە جەنابی نۊح
وات تەوفی توفان، مەجمەعەی ئاوان
واڎەی دووریش، ها، وە نزیک یاوان.[1]