داستانۊ حەیدەری و سنۊبەرۍ
بەشۍ چل و چوارەمە
حیلە و هەم مەکرو پیرەژەنەکۍ پەی حەیدەر بەگی یاگۍ قبووڵی نېیەن، ئاڎە گەرەکشەن بە هەر فڕوفېڵێ بۊن، حەیدەر بەگۍ بېیاونۊ بە خەنەبەڼانەکەو سنۊبەرۍ، گەرەکشەن بە پەنهانی حەیدەر بەگۍ ۋزۊنە سوورەتو ژەنێ، بە سووراو و سپیاو کەردەی، پۊشای پۊشاکی ژەنانەی، حەیدەری پەی دیڎارو سنۊبەرۍ بەرۊ، بەڵام حەیدەر بەگ پېسە پەیتواچش مڎۊوە:
بە من مەواچی، گۊنای وېت بتاش
پەرێ سەرکۊنەی، قەومی قزڵباش
بکەم وە بەردا، ڕەختی ژەنانە
پەرێ تانەی تاو، قەوم و بېگانە
پەی چی سەرگەردی، پای فورس نەبۊ
سەرم نە مەیدان، مەردان بەس نەبۊ
مەرگ پەی من خاسەن، نەک ئی ژیانە
شېرانی ئێران لېم بدەن تانە
ببوو بە سەرژان، ئەهلی ئێرانی
خەفیف بوو، جە ناو جەرگەی کەیانی
من نەسڵی دارا، واڵا مەکانم
ئاخر شېربەچەی ئەهلی ئێرانم
قەسەم وە بارگەی فەردی تەنیای تاک
جە هیند و کشمیر، نە داروون من باک
جە یومنی ئېقباڵ جققەی شا عەبباس
وەختێ بکېشوون، شمشېری ئەڵماس
کشمیر و کابڵ، تا بە قەندەهار
مەکەروون بە تېغ هیندیی یەختەسار
عەجەب ڕای خەلاس مەنمانی پەنەم
عەجەب نەسیحەت، مەواچی پەنەم
[1]