چڕاخم بەرزەن، چڕاخم بەرزەن
ئەر سەد چوون هەڵوەن دەماخت بەرزەن
مەتڵەبێ دارو نیازم عەرزەن
عەرزێ عاجزان وە حاکم فەرزەن
عەرزم هەر ئېدەن شای نەونەمامان
سەردار دەفتەر خەیاتەی خامان
توپی شېوەی خاس بۍ ئەندازەوە
پی دیەی شەهلای چوون شابازەوە
پی قەوس قەتران دەور دیدەوە
پی گۊنای گۊڵ ڕەنگ حەق ڕەژیدەوە
پی کەچی سەروین هەزار ڕەنگەوە
پی شېوەی شیرین شوخی شەنگەوە
پی مینای گەردەن ساف بۍ گەردەوە
پی شەعشەعەی شەوق لیموی زەردەوە
وەی پېڵوی ماشتەی قەتڕانیەوە
وەی ئامشۊی خاس ڕای کانیەوە
وېت مەحبووس کەردەن جەلای پیرەوە
چوون بیگلەربەیگی وە زەنجیرەوە
بې سەیدەن عەینەین مەخموور مەستت
بۍ خازن مەندەن گەنج دەربەستت
سپای ئەنجۊمەن دەور چای زەمزەم
بۍ ڕەونەق مەندەن گېرتەن باری خەم
لەعل ئەحمەڕیت ئەسفەر منمانۊ
کەس نیەن قیمەت ئەسلیش بزانۊ
من پەرێ تۊمەن شوخی جەمین جام
جۊش جوانیت زوو مەبۊ تەمام
بە دیدەت قەسەم دنیا درەنگەن
گەردش دەوران و هەزار ڕەنگەن
ها ئیسە توغیان نەوجوانیتە
وادەی عەیش و نۊش کامەڕانیتە
ئیسە های نەجۊش ئەوەڵ جۊشەدا
نەی تاف تۊغیان فام و هۊشدا
مەحبووسی لای پیر، وەسەن کافیەن
مۊدارات باعیس بۍ ئینسافیەن
چوون وېت پەسەن کەر یەک نەونەمامێ
نەمام نەوخېز شیڕین کەلامێ
بەو شەرتە حاڵ زان جەفا بەردەبۊ
مەشقی عەشق نە لەوح مەجنوون کەردەبۊ
بزانۊ بە قەدر خاڵانی ئاڵات
باڵای وېش کەرۊ، پشتان باڵات
ببۊت بە خازن گەنجینەی دەربەست
گەنجت و بۍ ڕەنج باوەرۊ وەدەست
تۊ لە شەوق ئەو، ئەو لە شەوق تۊ
ڕۊبەڕۊ عەشقت زیاتەر مەبۊ
خاڵانت مشۊ وەچاخ وەرین
موواچی «ئەحمەد» هەزار ئافەڕین
#ئەحمەد بەگی کۊماسی# [1]