داستانۊ حەیدەری و سنۊبەرۍ
بەشۍ شەس و نۊهەمە
حەیدەر، تاتەو سنۊبەرېش ئازاڎ کەرد، بەخشاش بە تایێ جە زوڵفانو سنۊبەرۍ. پېوەرە ڕاکۆتۍ، تاکو بە شارو ئەسفەهانی یاوێوە، قەوم و قیلە، پېوایشاوە ئامێ، زەڕئەفشانیی باڵاو سنۊبەرېشا، کەرد:
سنۊبەر بابۊش، ڕەها دا، جە بەند
بابۊش، جە ئی کار، مات و خجڵ مەند
حەیدەر وات، بە شا، پاسە بی تەقدیر
بە شاڎ بنیشە، جە شاری کشمیر
منیچ سەرچەشمەی ئەهلی ئێرانم
مەشهوور جە نەسڵی نەوەی کەیانم
جە ناوی ئێران، چوون خۆر هووەیدام
ئەولادی ڕەشید، دارای بن دارام
هېممەت خوایی کەرد، حەیدەر بەگ جە شاﮪ
چەنی سنۊبەر، ڕوو نېیان، وە ڕاﮪ
وەشاڎ تەی کەردەن، چەنی هەمڕاهان
تا یاوان، بە زەید، موڵکی ئەسفەهان
پیادە بین، جە ئەسپ، لوان بە یانە
حازر بین جە لاش، قەوم و بېگانە
قەوم و ئەقرەبا، خوېشانی حەیدەر
کەردەن زەڕئەفشان، باڵای سنۊبەر
حەیدەر بەگ واتش: ئەی یاری غەمخوار
مەشوون وە پاپووش، شاهی جەهاندار
سنۊبەر واتش: خوڎا یارت بۊ
دۊعای گەنجولعەرش، نیگادارت بۊ
[1]