باخچێوە بېگەرد
نویستەی: میرزا ئۆلقاڎرو پاوەی
بەشۍ: شەسس و ششەمە
عەبدولموتەلیب چڵاکیارە، جە فەرقشۆ تاکو دامانش عارەق مەڕېزا، وېش یاونا لاو کائینەکا، پەی تابېڵو وەرمەکەیش، پەنەشا وات: وەرمەکەت نېشانێنە پەی ئامای دنیای فەخرو کائیناتی، کە جە تەمامو دنیێ نامبانگ بەرمەکەرۊن، کە ئاڎییچ جە پەشتەو تۊن.
عەبدولموتەلیب، سەراسیمە وار
جە خاوی شیرین، دەرسات، بیی، بېدار
عەرەق جە فەرقش، مەڕېزا، تاو تاو
شیی بە لای کاهن، پەی تەعبیری خاو
دەرلا، پەی کاهن، خاوش، ئەدا کەرد
کاهن، جە ئەندۊش، کېشا، ئاهی سەرد
واتش: ئەی خاوە، ئەسڵش، تەعبیرەن
ئانە شەخسێوەن، ڕۊشەن، زەمیرەن
مەعلوومەن، جە پەشت، تۊ پېڎا مەبۊ
جە قاف، تا بە قاف، هوەیدا، مەبۊ
تەبعی موعجیزەش، چوون بریقەی بەرق
خارا، شەکافەن، جە غەرب، تا بە شەرق
جوملە مەخلووقات، دنیا، سەرانسەر
بە ئیعجازی ئەو، مەبۊ، موسەخخەر
موقیمانی فەرق، گردی مەلەکووت
ساکینان، سەتح، دایرەی ناسووت
غاشیەی ئەمرش، مەکېشان، وە دۊش
حەلەقەی غوڵامیش، مەکەران، نە گۊش
زەنجیر، دەلیلەن، پەی ئەحکامی دین
حەلقەش، ئوممەتەن، سیلسیلەی، چین چین
درەخت، شاهێوەن، جە دیدلئوسوول
هەرگیز، جە دارین، نمەبۊ، مەعزوول
هەکەس، جە ئەمرش، خیلاف کار مەبۊ
وېنەی قەومی نووح، گرفتار، مەبۊ
ڕای خەلەل، نېیەن، ، جە نبوەتش
شافیعەن، پەی گشت، گرۊی ئوممەتش
دەلیل، ڕەهبەرەن، ڕاسەن، ڕەهنموون
ئا، وەختەن، بەیۊ، نە ڕووی دنیای دوون
تەعبیری خاوت، خولاسەی کەلام
هەر ئېدەن، واتم، باقی وەسەلام.[1]