باخچێوە بېگەرد
نویستەی: میرزا ئۆلقاڎرو پاوەی
بەشۍ: هەشتا و ششەمە
میرزا ئۆلقاڎرو پاوەی، باس جە سەروەختو ئەسپارای (محەمەد)ی کەرۊن جە ئەڎێشۆ پەی حەلیمە سەعدیەی، بە وایەو شۊت دای پەنەیش و وێکەردەیش. ئامینۍ ئەڎاو محەمەدی (ص)، وەڵۍ ئانەی محەمەدش تەسلیم کەرۊن، مۊچیاری حەلیمۍ کەرۊن و ماچۊ:
ئاڎییچ هەم پەی وېش، خەیلێ دانابۍ
عیلمی نۊکەریی، زووتەر زانا بۍ
تومەز، ئا تیفلە، هەر بەو نەفامی
زانابۍ قانوون، خواجە و غوڵامی
تاحەزرەت تەمام، شیر نەکەردا نۊش
ئېڎ مەیلی شیرش، مەکەرد فەرامۊش
جە دمای حەزرەت، هەر ڕۊ نەرمۊوە
مەوەردش، کەمکەم، جە ڕووی شەرمۊوە
ئامینە قیسەی حەرفی وېش تەمام
موعجیزەی ڕەسوول، عەلەیهی سەلام
گرد پەی حەلیمە، یەک یەک، بەیان کەرد
تا چن دەلیلی بورهانش، ئاوەرد
واتش: وە فرمان، وېت نەکەی خجڵ
هەرگیز، محەمەد، نەکەری غافڵ
ئیخباری یەهوود، کاهېنانی کار
ڕەمزش، جە لاشان، نەبۊ ئاشکار
بۍ کەس، بۍ دڵسوز، بۍ قەوم و خوېش
نەوا، ئاسیبێ، دووربا، یاوۊ پېش
ئینە، ها واتەم، بگېرە، نە گۊش
لەحزێ، محەمەد نەکەی فەرامۊش
چەنی شووهەرت، نەشیی نە جای خاو
موبەدیل مەبۊ، عەیشت، وە زوخاو
ئەر سەرت فەلەک، ژېرت، هەم خاک بۊ
با قەلبت، تاهیر، شیرین هەم پاک بۊ
خوڎای محەمەد، زاتی بۍ زەواڵ
مەویانۊ، پەرێت، جە توعمەی حەراڵ
جە سایەی حەزرەت، خۊش نشین مەبیی
دایېم، دەوڵەتمەند، دنیا و دین مەبیی
غەرەز، ئەو سەردار، نازەنین نازان
تاکە فارغ بیی، جە ڕېزە ڕازان
هەرچی، نەقدی جینس، حازر بیی جەودەم
گرد وە حەلیمە، یەکسەر، کەرد کەرەم.[1]