#وەلی دېوانە#
بایەقوش ناڵان، بایەقوش ناڵان
تۊ هۆ کېشەنی، من هەر شەو ناڵان
من خېڵ شادیم شەخسێ کەردەن تاڵان
تۊ چېش پېت ئامان هامدەردی ساڵان
ناڵەی من جە سۊک سەودای ئەو یارەن
دڵم جە دۇری ئەو بېقەرارەن
من (پەروانە)ی شەوق (شەم) جەماڵێکم
کوشتەی نیگای ناز سۊسەن خاڵێکم
تۊ شەوان تا ڕۊ بانگ هۆهۆتەن
دەردەکەی دۇری زامەت جە کۊتەن
من سفتەی سۊزان شۊڵەی ئەو نۇرم
بە ڕۊ هەراسان بە شەو (دەیجۇر)م
تۊ داخ هجران کېت نە دەرۇنەن
چۇن من سەرگەردان جەستەت زەبۇنەن
من موبتەلای دەرد مەست مەفتۇنم
جانشین جای (قەیس) مەجنۇنم
تۊ جە عەشقی کۍ وېڵی و دېوانە؟
شەوان بېداری نە جای وېرانە
خۆزگە پېت سەد جار دەردین دڵڕېش
وە جەستەی من نیت جەور و جەفاکېش
تۊ هەر نە خەیاڵ جای وېرانانی
بېباک و لاقەید تیر و تانانی
درېغا منیش وەی گشت داخەوە
وە داخ ئەو شەم شەو چراخەوە
شەو خەریک کونج جای ماتەم بېیا
شەوانیچ نە بەزم شادی شەم بېیا
[1]