ڕاوەشکار جە هۆرامانەنە
ئەوەنویستەی و دەسکاریکەردەی: ئەسعەد ڕەشید
بەشۍ یەکەمە

ڕاوە جە هۆرامانەنە، وەڵینێوە دوورش هەن، ڕاوە ژەرەژ، تامو لەزەتێ تایبەتش هەن، ڕاوچیۍ چن شەوێ کەشەکاوە مەناوەو ڕاوەکەران. ژەرەژی باڵدارێ زەریفەن، دەنگ وەشەن، بەڵام پاسە ئەشناسیان کە وېوەرەن. چن جۊرۍ ڕاوە جە هۆرامانەنە هەنە:
-هۆرېشەڕاوە.
-کەڵەڕاوە.
-خووگەڕاوە.
-چالەکەڕاوە.
-ڕاوە ژەرەژ(ویار).
-شەڕەبەق.
-چېڵکڕ(جەنگو ژەرەژە مېڵا).
-کۊڵیت(وۍ مەڵاسدای پەی ژەرەژۍ).
-ڕاوە ڕەت(جۊرێ تەڵەن پەی ژەرەژا).
-ڕاوە دیجامە(پارچە قوماشێ ڕەنگاوڕەنگەن، باعزە ژەرەژێ عاشقېشەنۍ).
-کۊیۊز(جورە ڕاوێنە کە بە میکانیزمێ فرە ورد کریۊنە).
-هەوازەنی(ژەرەژ کۊشتەی هەوانە، نیشانەگېرتەیۆ باڵدارا ئاسمانۆ).
-تەڵە(کە چن جورێش هەن، پېسە تەڵەڕواس، تەڵەوەرگ، تەڵەچالەکە،...هتد).
-ڕاوە بە کوولەکۍ(کە زیاتەر پەی ڕواس گېرتەی و هۆرېشە گېرتەیەن).
-ڕاوە تانجی(کە بە تانجییە کریۊن، یانی تانجیێ تەر بەکارماران پەی ڕاوەکۍ).
-ڕاوە ئایېرەمەلی(بە برک، یان بە تاپڕ، وەختو میوە یاواینە کە هېرش ماران).
-ڕاوە ماساو، ڕاوە پوڕە، ڕاوە سۊنۍ،..هتد.
بە کۊڵی، ئانۍ سەری، کەمێنۍ جە چڼەها جۊرە ڕاوا، کە جە هۆرامانەنە باوېنۍ و هەر جورێشا تایبەتەن بە وەرزێ جە وەرزەکا ساڵۍ و پېویسی و کەلوپەلو وېش هەنش.
خەڵکە بېدەسەکە، یان هەژارەکە، وەرزو زمسانینە تەواناو ڕاوېشا نېیەن، چوونکم زمسان سەرد و سهۊڵبەڼانەن، بەڵام خەڵکە دارا و شېخ و بەگزادەکۍ، گرڎ وەختێنە، گرڎ وەرزێنە ڕاوەو وېشان کەران.[1]