وەلی دېوانە
خەسرەو خەیاڵێ، خەسرەو خەیاڵێ
ئاخ پەی خانی خاس خەسرەو خەیاڵێ
ساحېب سپا و سان دارا ئېقباڵێ
موهەییا نە گەنج خەزېنە و ماڵێ
بەخشەندەی بېباک کۊی کەرەم بەیا
ساحېب شەوق و زەوق دڵ بېغەم بەیا
با ماوە شکار سەر دېیاران دا
وە ماوای مەجنۇن ڕۊزگاران دا
بڎیا وە جەستەی خەم پېوارام دا
وە کۊمەی دیوان وەحشی سارام دا
وە سەیلی ئەسرین دیدەی تارم دا
وە دەردی دەرۇن ئەندۊبارم دا
وە عوریانی (تەن) تەنیای تاکم دا
وە سەنگی باڵین خەفتەی خاکم دا
وە سەرگەردانی سەحرای چۊڵم دا
وە عاسا و کەشکۊڵ پۊس کۊڵم دا
وە ئاﮪ و ناڵەی شەوان تا ڕۊم دا
وە زایەڵەی سەخت شینی بېشۊم دا
وە پەشېوی بەخت شۇمی چارەم دا
وە زوخا و زام جەرگی پارەم دا
وە بڵېسەی بەرز گڕتۍ بەستەم دا
وە خەستەی خاتر خار جەستەم دا
بەزەییش باما وە جەستەی حاڵم
بزاناش کوشتەی کامین نەوهاڵم
جە کېوەن خاتر خەستەم گېرتەن خەم
سفتەی سۊزانم چۇن پەروانەی شەم
سەرمایەی عەقڵم کۍ کەردەن غارەت
کام دڵبەر بەردەن وە یەک ئیشارەت
بەڵۍ ئەو خەیاڵ (نەوفەل) نەدڵ بەرد
گېیان وېش هیلاک ژاری قاتڵ کەرد
نەکەردا ئەو فېکر ناوەردا نە دڵ
نەشیا نە سەودای خەیاڵی باتڵ
یا وە گەنج و ماڵ یا وە زۊری وېش
شاد کەردا خاتر دېوانەی دڵڕېش
بکەردا هېممەت چۇن خانی (حاتەم)
(شەم) واسېڵ وە من، من واسېڵ وە (شەم)
هەر چەند مەوینۇن نەی ڕۊزگاران
کەس نېیەن دڵسۊز سېیا ستاران
مەر هەر خوداوەند گوشایەندەی بەخت
ڕەها بدۊ بەخت من نەی بەندی سەخت
وەرنە ئی بەندە زەنجیری پامەن
تا مەردەن چۇن قەیس وا حەسرەتامەن
[1]