باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و هەژدەهەمە
خەدیجە، ئەژنیش کە محەمەد عەزموو تجارەتیش هەن، پەوکەی بە دڵ وەشییۆ واتش پەنە، هەردوېشان ڕازیۍ بیۍ، خەدیجە زەڕش دا خزمەتو محەمەدی، دوۍ نەفەرېش چەنی کیاست پەی شارەزایی ڕاکۍ، کاروان و بازرگانی جمارە
قاسید، سفارش، ڕېزەی ڕاز شەربەت
یاونا، خزمەت، شای شیرین حەزرەت
حەزرەت، تەقدیر کەرد، وە فەراحەت باڵ
پەی ئەبوتالیب، چگۊنەگی حاڵ
ئەبوتالیب هەم، بە شاڎیی و مەزاق
واتش: لە الحمد، نیعمەلئیتیفاق
واتش: خوداوەند سیڕڕی سوبحانی
ڕزقێوەن، پەی تۊ، کەردەن ئەرزانی
جەودما، حەزرەت، شای خەیرولبەشەر
کەردش، تەدارەک، ئیرادەی سەفەر
خەدیجە، مایەی تجارەت، دا پېش
مەیسەرە) نامێ، هەم غوڵامی وېش)
پەی خزمەتکاری شاهی ئەنبیاﮪ
هەم پەی وەقیعە، هەم بەڵەدی ڕاﮪ
ئەرسەد، کە دېرەن، مەنزڵ هەم دوورەن
جە بەعزێ کیتاب، وەیتەور مەستوورەن
خەدیجە یەکێ، جە قەومانی وېش
ئەمین و مەحرەم، زەرگشانی وېش
حوزەیمە) نام، سوخەن سەنجیدە)
دانای دانشمەند، دڵ پەسەندیدە
چەنی (مەیسەرە)، ئەو دوو هەم نەبەرد
هەردوو بە خزمەت، حەزرەت ڕاهیی کەرد
قافیلەی قوڕەیش، وە عەزمی سەفەر
ڕای چوڵ و بېدی گرتشان، نە وەر
حەزرەت سوار بیی، وە پشتی ناقە
چەنی غوڵامان شیرین عەلاقە
مەنزڵ، بە مەنزڵ، منمانا، ئەعجاز
کەش و کۊ و کەمەر، چەنیش مەکەرد ڕاز
جە ئەسڵی ڕاودا، واڎەی عەسری تەنگ
ناقەی خەدیجە پای ڕاسش بیی لەنگ
هەوا، هۊڵناک، ڕاگە خەوف و بیم
جیا مەند، جە شۊن، قافڵەی عەزیم
حوزەیمە، دەرلا، عیلاجش نەکەرد
تا، ئاخر، هاناش، وەلای حەزرەت بەرد
حەزرەت گېڵاوە، مەندەر کەردەوە
تا جە لای ناقە، پا ئاوەردەوە
دەستی موبارەک، ماڵا وە پای ئەو
خەیلێ مەشغووڵ بیی، چەنی دۊعای ئەو
ناقە، پای سەقەت، فەوری ئاخېز کەرد
بارۊیش تەمام، سەربارش هەم بەرد
نیشت نە جامبازە، مەفڕیا، چوون تەیر
حوزەیمە، دەرلا، جە دوور مەکەرد سەیر
سەڎای زەنگی ئەو، مەشیی وە فرسەنگ
پەی گرد قافڵە بیی، وە پېش ئاهەنگ
حوزەیمە، ئەی کار، خەیلێ غەریب دیی
هەم چن موعجیزات سەختی عەجیب دی
واتش: محەمەد، شانش عەزیمەن
فەرموودەش، مەقام ڕای موستەقیمەن.[1]