باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و وېس و هەشتەمە
محەمەد ئەچا وەختەنە فرە خەمباربۍ، هەم تەرسیش نېشتېبۍ وەنە، چوونکو بارێ ئەچامنە، ئاسان نېیەن، دنیاو غەیبینە، هەڵای یەقین نېیەن. پەوکەی محەمەد گېڵاوە پەی یانەی، پەی لاو خەدیجەی هامسەرېش.
نیدایێ ئاما، وات: یا محەمەد
حەبیبی حەزرەت، ئەزەل و ئەبەد
ئانە کۊ مەشیی، خەیاڵت چېشەن
خاترت، جە کۍ، دڵ، وە ئەندېشەن
تا حەزرەت، نەزەر، وە ئاسمان کەرد
دیش کە جوبرەئیل بە شېوەی یەک مەرد
مدران، موعەوەق، ها وە فەوقەوە
تەن، وە جەلای نوور، شاڎیی و زەوقەوە
وات: یا محەمەد، خۊ من دەلیلم
تۊ، ڕەسوولەڵڵا، من جوبرەئیلم
ئەندېشەت نەبۊ، خەوف بەرکەر نە دڵ
مورادت جە لای حەقق بېیەن، حاسڵ
حەزرەت، جە مەعنای گفتوگۊی بېگەرد
جە خەیاڵی وېش، پەشیمانی وەرد
وە هەر تەرەفدا، ئیرادی ڕاش بۍ
فەوری جوبرەئیل جە نەزەرگاش بۍ
بەعدەز وقووعی قەزییەی عەزیم
بە چەند خەیاڵات، بۍ خەوف و بۍ بیم
هەم ڕۊ، وە مەککە تەشریف ئاوەردش
تەشریف وە مەنزڵ، خەدیجە بەردش
خەدیجە عەرز کەرد، یا ئەبولقاسم
جە دووریت، بڕیان، خاو وخوراکم
قاسید کیانام، دیارت نەبۍ
دووربا، دوور جە تۊ، ئاسارت نەبۍ
تەشریفی خەیرت، وە کۊ بەردەبۍ
بە خوڎا، ئیمانم، پەی تۊ هەردە بۍ
فەرما من خەوفم خەیلێ ها نە دڵ
فیشتەر دەغدەغەم، پەی بېیەن حاسڵ
پەی چېش، ئەو شەخسە، نەوا کاهن بۊ
وە زاهیر، تڵا، وە بەتن ئاهین بۊ
خەدیجە عەرز کەرد، وات: مەعازەڵڵا
ئەی نووری عەینەن، ئیبن عەبدوڵڵا
خوڎای زیلجەلال بۍهەمتا فەردەن
فەزڵی وېش بەتۊ، ئەرزانی کەردەن
من ئومېڎم هەن، ساحیب عیزەتبای
هەنی پېخامبەر، موڵکی میللەت بای.[1]