#ئاغا عەنایەت#
دڵم نە جۊشەن...
یاران هامسەران دڵم نە جۊشەن
قوڵ مەڎۊ وەهەم بەس نە خرۊشەن
سفیدی تاڵەم چۇن سېیاپۊشەن
قەلب مېحنەتبار دایېم بېھۊشەن
چەن فېکر و خەیاڵ زوخاو نە تۊشەن
کۇرەی ئاهەنگەر جەلاش خامۊشەن
سەماوەر جەو بۊن هەر نە خرۊشەن
کەللەم بېڕەمەق مدران وە پاوە
ئېنتېزار مەرگ بەیۊ جە لاوە
گۊش بەرگی نمناک ماتەمی پۊشان
دیدە پەی بینش هەر پا نەحاشان
مۇی سېیا مەیلش وە من نەمەندەن
سفید نە موڵکش خۊ بەزرش شەندەن
قرمزی ڕوخسار خەزانش کەردەن
باد بەرگی خەزان هەرد ئەو هەرد بەردەن
پیری و جوانی ئەسڵەحە پۊشان
کەمەندی پیری جوانی کېشان
وەی تەور گرفتار دامی ئەو بېیەن
تا ئاخر نەفەس خەلاسیش نېیەن
دەندان خۊ ئەسڵەن توخمش نەمەندەن
دەلاکی پیری نە ڕیشەش کەندەن
ڕوخساری سافم چرچ و ئاوېزان
نۇری بەشەری نە ئەو گورېزان
پیری وە سوپای شەڕ ئەنگېزەوە
سوارەن یەک یەک وە شەودېزەوە
زەفەر وە لەشکەر جوانی بەردەن
نە قەڵعەی وجۇد مەحسۇرش کەردەن
نمازۊ یۊشان بکەران هاوار
هەر ڕۊ یەکېشان مەکېشۊ وەدار
سێدارە نە پای قەڵعە نە کارەن
تېخی جەلادیش نە زەهری مارەن
دەسبەردار نېیەن تا نەفەس دارۊ
تا ئاخر لاشەش وە خاک مەسپارۊ
دنیا هەر وەی تەور ئامان و شېیەن
چەن هەزار هەزار عەنایەت دېیەن
[1]