#وەلی دېوانە#
هامسەران تارەن، هامسەران تارەن
ئېم ساڵ بیناییم تاریک و تارەن
زەوقی زیندگیم چۇن ژاری مارەن
دنیا جە دیدەی (وادیولقەهار)ەن
گشت عاڵەم نە وەقت فەسڵی نەو-وەهار
شاد مەبۊ وە زەوق گوڵان و گوڵزار
من ئېم سال وەهار شادیم ناشاد بۍ
پەرېشان جە گشت ڕەنجم وە باد بۍ
بوڵبوڵ شاد وە گوڵ من ڕەنجەڕۊ بیم
ڕەنجەڕۊ جە زەوق وەهاری نۊ بیم
ئېم ساڵ نەو-وەهار فېشتەر جە ساڵان
ڕازانش ڕەونەق ڕەنگی گوڵاڵان
هەردان، هەڵەتان، ساران، هەواران
خەیمەی گوڵ پۊشان خاستەر نە جاران
من هەر گوڵزارێ نە دیدەم خار بۍ
هەر سەوزە وەنەم وە ژار مار بۍ
هەر چەمەن سەودای جوانیم جا کەرۊ
هەر لالە سەودای دەرۇن داخ کەرۊ
هەر شکۊفەی شەوق شېوەی «شەم» پېش بۍ
دېیام وە پېشدا خاترم ڕېش بۍ
وەهارێ وەی تەور خۊ جە لام دۇر بۍ
چەمان نە دیدەم نېشی زەنبۇر بۍ
ئای خۆزگە وە ساڵ نەو-وەهاری پار
هەر ڕۊ سوب سەحەر مەدیام باڵای یار
وەهاری ئېم ساڵ پەشېو جەستەنان
دۇر جە دنیا و دین ئانە خەستەنان
[1]