باخچێوە بېگەرد
ئەوەنویستەی و دەسکاریکەرڎەی: ئەسعەد ڕەشید
بەشۍ سەڎ و پەنجا و ششەمە
نەجاشی، بە جوابەکا جەعفەری وەشحاڵ بی، زاناش ئانەی کە ئاڎ باسشکەرۊن و تاریفېش مڎۊن، پېخامئاوەرو ئاخر زەمانییەن، نەجاشی وېش پەنە نەگېریا، هەرسی بە خۊڕ مجېرە.
نەجاشیی پەرسا هیچ هەن جە لاتان
جەو ئایەی شەریف کەلاموڵڵاتان
جەعفەر وات: بەڵ ئەی شاهی دانا
سوورەی (کساف، ها، عەین، صاد) وانا
بۍ شک تاسیرش سەنگ مەکەرد بە ئاو
دڵ و دەروونش مەکەرد بە کەواو
نەجاشیی وە جۊش ئەوەند کەرد گرین
سککەی سفیدش تەڕبیی وە ئەسرین
موقەرەبانش یەک یەک گرد حەزین
گرد سەیل ئەسرینان ڕېزنان زەمین
واتش: ئەی کەلام جە خاس دەلیلەن
ناسخی تەورات نەسخی ئینجیلەن
مەعلووم بۊ جە لای گرد سوخەن دانان
هەر سێ ئەی کەلام نە یەک جا ئامان
جەو دما واتش: من ئەی جەماعەت
پەرێ ڕووی دنیا هەرگیز یەک ساعەت
مەدەون وە دەسی قوڕەیشی مەغروور
ئەگەر پېم بدات بەهای یەک کلوور
وات: جە موڵکی من بە فەراغەتی باڵ
بنیشن ساتێ تاکە هەزار ساڵ
بەرات و ئەنعام، مدەروون پېتان
تەرخانی مەعاف ساکن پەی وېتان
ئیبنی ڕەبیعە چەنی عەمر و عاس
نائومېد بەرشین هەم بە نائیخلاس
هەرکەسێ ئەزیەت بە ئېوە دەرۊ
بېجا مەکەرۊ سەر وە سەنگ دەرۊ
دەستی زوڵمی کەس نەمیاوۊ پېتان
مەشغووڵ بین بە ئەمر مەعبوودی وېتان
تاکە بزانین جە بازیی چەپگەرد
چەرخی ڕوژگار چېش ماوەرۊ نەرد.[1]