باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و حەفتاهەمە
عوممەر و کوڕو خەتابی، جە ناگا ئاما پەی خزمەت و ڕەسوولەڵڵای، وەختێ دیش ئەبوبەکر پا تەرزە زامڎار کریان، پېسە شېری هەڵمەتەش بەردەو زیارە ڕوەو کۊنیشتو قوڕەیشیەکا.
جەو دەمدا حەزرەت دەس بە دۊعا کەرد
فەوریی ئومی خەیر ئیمانش ئاوەرد
یەک ماه تەوەقوف کەردەن جەو یانە
مامان وەلاشان خوېش و بېگانە
جە ناگاه عوممەر شېری نەڕ باهوو
ڕضی الله تعالی عنە
ئاما جە لاوە بۍ خەبەر جە کار
سوجدە بەرد وە ڕووی موستەفای موختار
عەرز کەرد یا ڕەسوول دەروون پەڕ خارین
ئېمە تا کەی دین پەنهان بدارین
حەزرەت حیکایەت سیدیقی ئەکبەر
ماجەرای کوففار گرد کەرد بە پەی عومەر
فەوری ئاخېز کەرد شېری سەهمناک
بەرشیی جە مجلیس چوون شېری بۍ باک
ئەوەڵجار تەواف (کەعبەتوڵڵا) کەرد
باز هەم وە مەجلیس قوڕەیش تەشریف بەرد
ئەبوجەهل وات: ڕاسەن ئەی عوممەر
ڕای دینی ئیسلام گرتەنی نە وەر
سوجدە وە خوڎای نا دیڎە بەردەن
شەهادەت وە شان ئەحمەد ئاوەردەن
جە دینی قەدیم جەدد و ئابای وېت
وېیەردی سەڎ حەیف یە چېش ئاما پېت
بە خودای هیبەل بت و بتخانە
نەتەرسای، وېت کەرد ڕیسوای زەمانە.[1]