باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و حەفتا و یەکەمە
وەختێ عومەر یاوا کونیشتو قوڕەیشیەکا، فرە لۊمەشان کەرد، بەڵام ئاڎ سووربۍ سەروو ویروباوەڕە تازەکەیش، پەوکەی کەوتۍ پەلاماردای عومەری، بەڵام عومەر شېرئاسا، ئامەوە دەسۍ.
عوممەر وات: بەڵ من موسوڵمانەم
عەبدی پېغەمەرئاخر زەمانەم
اشهد ان لا الە الله
وە محەمەد هەم ڕەسوولوڵڵا
خوېشانی کاف، جە لام بېگانەن
بتخانان گردین، چوون ئەدەبخانەن
ئەبوجەهل، غەرەز نە کەلەش جۊشا
سیاه بیی جە قار جۊشا و خرۊشا
دووسی پەنجا کەس حازر بین جەو دەم
پەی قەسدی عوممەر نیاشان قەدەم
عوممەر سیلاحش نەبی جە وەردا
یەک دەس کەرد ئەسپەر کېشا وە سەردا
ئەو دەس کەرد وە گورز باهوو بڵند کەرد
مڎاش وەفیلان چوون حەربەی نەبەرد
وە هەرکەس مەدا مشتی سەهمناک
چوون مەوتی بۍ گیان، مەکەوت نە ڕووی خاک
مشتدا وە فەرقی ئەبوجەهل وەقار
فەرقش دووە لت بیی، بە وېنەی خەیار
ئاخر عەتبەی ڕەبیعە چەو دەم
یاوا وېنەی کو پەنجەدان وە هەم
عەتبەش هۊرگېرت، چوون کوهی خارا
داش وە زەمیندا، چوون سەنگی سارا
مشتێ دا وە ڕووی ڕوخسارش وە زۊر
بینایی ڕاسش دەر سەعات بیی کۊر
ئەبو لەهەبش تار نا وە تار
مەخشووش کەرد بیسات تۊمی بەڎکردار
خولاسە ئەو ڕۊ شکست دا پېشان
یەکیەک ڕوو نیان وە یانەی وېشان
عوممەر وېنەی شېر مەستی بۍ ئەندېش
جە هیچ تایفێ نمەکەرد ئەندېش
مەگېڵا بۍ باک تەنیا وە بېخەم
مەشیی وە تەواف کەعبەی موعەززەم
جە لای سەنادید مەبەردەن نامش
یەکسەر، مەلەرزان دایېم، جە سامش
دیسان تەشریف بەرد، وە (دار الارقم)
یاوا بە حوزوور ئەنبیای خاتەم
چگونەگی حاڵ مەعرەکەی نەبەرد
ماجەرای موشریک سەراسەر عەرز کەرد
حەزرەت فەرماوا بەڵۍ یا عوممەر
مەگەر خوڎاوەند کۊمەک بۊ جە سەر
ئەگەر نە کوففار بۍ حەدد شومارەن
سەحابە ئەندک جە موو دیارەن.[1]