گرنگیی شیعر لە پەڕتووکی پڕۆگرامی خوێندندا
#ڕۆستەم خامۆش#

شیعر، ئەو ژانرە گرنگ و ناسک و جوان و هەست بزوێن و پڕ لە سۆز و چێژبەخشەیە، کە پانتاییەکی فراوانی لەنێو ئەدەبیاتدا داگیرکردووە و گەیشتووە بە ‌ترۆپک. لە ئەدەبیاتی منداڵانیشدا، شیعر هەر پلەی یەکەمی وەرگرتووە و پێگەی تایبەتیی خۆی هەیە و زیاتر لە ژانرەکانی تر نووسراوە.
بۆیە دەمانەوێ باس لە گرنگیی شیعر و ئەدەبی منداڵان بکەین کە لە پەڕتووکەکانی پڕۆگرامی خوێندندا شوێنی بۆ کراوەتەوە و دەخوێنرێ و تا ڕادەیەکی باش بایەخی پێدراوە، بەڵام ڕەنگە وەک پێویست نەتوانرابێ باشترینی ئەو شیعرانە بخرێنە نێو پەڕتووکەکان کە تایبەت بە جیهانە پاک و جوانەکەی منداڵان نووسرابن، بەڵام دانانی شیعر لە پەڕتووکی خوێندنی قوتابخانەدا، کارێکی زۆر باش و ژیرانەیە.
وڵاتانی پێشکەوتوو سوودیان لە ئەدەبی منداڵان وەگرتووە بۆ پەروەردە و فێرکردن، چونکە ئەدەبیاتی منداڵان هاوکات لەگەڵ پەروەردە و فێرکردندا، دەتوانێ ڕۆڵ و کاریگەریی خۆی هەبێ لە بەرەو پێشبردنی پەروەردەدا، چونکە خاڵی هاوبەش لەنێوان ئەدەب و پەروەردەی منداڵاندا هەیە، هەر وەکوو دەبینین لە پەڕتووکی خوێندنەوەدا، لە پۆلی یەکەمی بنەڕەتییەوە هەتاکو قۆناغی ئامادەیی، شیعری تێدا جێیکراوەتەوە و بووە بە وانەیەکی گرنگ و سوودبەخش و چێژبەخش، بەڕاستی ئەوانەی بیریان لەوە کردووەتەوە کە شیعر بخرێتە نێو پەڕتووکی پڕۆگرامی خوێندن و وەکوو وانەیەک بخوێنرێ، دەڵێین بەڕاستی ئەو کەسانە شارەزا و ئاوەزمەند و ڕۆشنبیر بوون، چونکە زانیویانە شیعر، جگە لەوەی قوتابییان، وەک وانەیەک دەیخوێنن و سوودی لێ دەبینن، حەزی خوێندنەوەشیان زیاتر دەکات و لە بیریشیان ناچێتەوە. بۆ نموونە: ئەو شیعرانەی کە لە قوتابخانەدا خوێندومانن و ئەزبەرمان کردوون، زۆربەمان دوای تەواوکردنی خوێندن و بەڕێکردنی تەمەنێکی زۆریش، هێشتا هەر لە هزرماندا ماونەتەوە. بۆیە پێویستە ئەم بابەتە بە گرنگ بزانرێ و قسەی زیاتری لەسەر بکرێ. بە بۆچوونی من، وا باشە، لە دۆخێکی ئارام و کاتێکی گونجاودا، پێداچوونەوەیەکی ورد و زانستیانە بکرێ بۆ ئەو شیعرانەی، کە لە ئێستادا وەکوو وانە دەخوێنرێن، دەبێ شیعرەکان لە بازنەی ئەدەبی منداڵاندا بن و زۆر بە وردی ڕەچاوی تەمەن و قۆناغەکانی خوێندن بکرێ. بەڵێ پێویستە: (کەسانێکی ئەدەبناس و دەروونناس و شارەزایان و پسپۆڕانی بواری پەروەردە) ، پێداچوونەوەیان بۆ بکەن و ئەو جۆرە شیعرانە جێیان بکرێتەوە و دابنرێن، کە بە شێوازێکی سەردەمیانە منداڵانیان پێ پەروەردە دەکرێن و هانیان دەدەن بۆ: (ژینگەدۆستی و چاکەخوازی، هاوکاری و پێکەوەژیان و تەبایی، ئاشنا کردنیان بە بەها باڵاکان و ڕەوشتە جوانەکان، نیشتمانپەروەری و ئەمانەتپارێزی، ڕاستگۆیی و دەستپاکی، خۆشەویستی و لێبوردەیی.[1]