باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و حەڤڎەهەمە
خەولە، ژەنێ پەڕ حەیاو حیشمەتە، ئاما خزمەتو پېخامئاوەری، واتش: گەرەکمەن ئیجبی ژەنېت پەی کەروون، حەزرەت فەرماوا: ئا ژەنۍ کېنە، ئەسڵش کېن، کۊگەیەنە؟
خەولە واتش: عائېشە کناچەی ئەبوبەکری سدیقەن، ئیترحەزرەت ڕەزاییش نیشاندا، خەولەش کیاستە وە یانەو ئەبوبەکری.
تا یەک عورەت پەڕ حەیا و حەلیم
مەشهوور بە (خەولە) کناچەی حەکیم
دایېم نە خدمەت خواجەی کائینات
گوستاخی مەکەرد بە عەجایېبات
جەو دەم دا (خەولە) شوخی نازەنین
ئاما وە خزمەت فەخرلعالەمین
واتش: یا حەبیب سەرم بۊ فدېت
مازوونم من ژن بوازوون پەرېت
شای خەتمی پەنا، شای گەردوون بېگەرد
وە حەریفی خەولە تەبەسومی وەرد
فەرما زەن جە کۊ، ماوەری پەرېم
نەسڵی ئەو جە کېن، نامش واچە پېم
وات: بەکرت مەبۊ پېت کەروون تەحقیق
عائیشە دوختەر، بووبەکری سیدیق
ئەر بەیۊت مەبۊ ها سوودەی وېمان
ئەو زووتەر بە تۊ ئاوەردەن ئیمان
فەرما بە تەوفیق دەهەندەی داوەر
بشۊ هەردووشان خواستگاری کەر
خەولە بە فرمان ئەمری پېغەمەر
ڕوو کەرد وە یانەی سیدیقی ئەکبەر
شیی بە لای عایشەی ئەعلا
ڕضی الله تعالی عنها
خەولە عەرزش کەرد یا ئومی ڕەممان
تا سەر بۊ کەرەم خوڎای ئاسمان
خواجەی کائینات منش کیانان
تۊش بە جای ئۊمېد تەوەقوع وانان
مەیلش عائیشە، ئەر سەد مناڵەن
نەزەر کەردەن لېش پەی ئەو حەڵاڵەن
ئومی ڕەمان وات: سەبر بکەر تۊ
تاکە ئەبوبەکر تەشریف باوەرۊ
سیدیقی ئەکبەر دارای زەمانە
جەو دەم تەشریفش ئاوەرد وە یانە
خەولە عەزش کەرد مەتڵەب سەراسەر
وات: عەرز بکەم، هەم بە پېغەممەر
عائیشە جارێ هەڵای مناڵەن
تەحریری تاریخ عومرش شش ساڵەن
من دایېم ڕۊحم هانە خاک و پاش
مەتڵەبی هەنی عەرز بکەر جە لاش
من بە برادەر قەرارش دادەن
عائیشە بە ئەو برادەر زادەن
ئەی عەقیدە مەکرووە یاخو جایزەن
ئەرسەد کە ئەهلی پەیوەند فایزەن.[1]