باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و یەکەمە
میرزا ئۆلقاڎرو پاوەی، ئەچی بەشەنە ڕازێ یان چیروکێمان پەی مەگېڵنۊوە، ئیتر نمەزانمۍ ئەرۍ ڕاسەن یان چنیان؟
قوڕەیشیەکۍ نەتاواشا وەراوەرو موعجیزەکا حەزرەتی، وەردەمو ڕاسیەکانە، ویژدانشا بە حەکەم کەران، بە پېچەوانۆ، کۆتۍ تەگبیرکەردەی پەی دژمنایەتی چەنیش.دوەسەڎ نەفەرۍ چاییشا جەمۍ بیێ، بە کینە و غەرەزێ بۊگەن کۆتۍ تەگبیرکەردەی. نەفەرێشا کیاست شونەو حەزرەتی، تەشریفش ئاما، قوڕەیشیەکۍ داواشان وەنەکەرد ئەپی تەرزە:
گەر تۊ پېخامئاوەرو خوڎاینی، بە موعجیزەکات مەتاوی ئا درەختە، ئەچا دوورۆ، باریش وەردەممان؟
حەزرەت فەرماوا: گەر ئاما چېش؟
واتشان: ئیمان بە پېخاماکەیت مارمۍ.
ئەهلی سەنادید ئەشراف قوڕەیش
ڕوئەسای قوڕەیش ڕەنگبافی قوڕەیش
یەک ڕو عەتبە و شیب و ئەرقەم
ئەبوسوفیان ئەبوجەهل وە جەم
تەقریب بە دووسەڎ بۍ زیاد و کەم
جە سەحرای مەککە جەم بیی جەماجەم
چن تەدبیری سەخت عەجایب کەردەن
چن کینەو غەرەز نەدڵ ئاوەردەن
ئاخر یەک نەفەر جە ئەهلی ئەشرار
کیاستەن وە شۊن شای بوراق سوار
تەشریف باوەرۊ ساتێ وە سارا
شاڎ بەو دیدەنیش دارا و نەدارا
شای خەتمی پەنا فەوری تەشریف بەرد
ئەهلی قوڕەیشی یەکسەر ئاخېز کەرد
فەرماوا بە من چېشەن کارتان
خوڎا بېزاربۊ جە دیدارتان
واتشان: بە تۊ کەی ئەی محەمەد
یەک عەرز دارین ئەر نیکەن ئەر بەد
تۊکاری عەزیم گرتەنی نە سەر
بەو کارە قوڕەیش مەبۊ دەربەدەر
جە ئابادی تۊ ئامان وېیەردەن
هیچ کەس ئەی کارە مودعا نەکەردەن
ئېمە حاجەتی گرد بە تۊ دارین
گوشەی موعجیزات وە چەم مەدارین
ئەگەر تۊ ڕاسیی ئەی کارە کەردیی
مودەعای قەومان وە جا ئاوەردی
گرد ئیقرار دارین وە پېغەممەریت
بە شەفاعەت خوای ئوممەت پەروەریت
حەزرەت فەرماوا: خەیاڵی خامەن
مەرامتان چېشەن ئەو کارە کامەن
واتەن: ئەو درەخت دیارەن جە دوور
تۊ ئەر تەلەب کەرد بەیۊ وە حوزوور
ڕیشەش هەرچی هەن هۊرکنیۊ جە خاک
شاخ و بەڵگش گرد جە یەک نەبۊ تاک
بەیۊ وەی مەجلیس بېپەروا جە نۊ
چەنی تۊ وازیح کەرۊ گفتوگۊ
حەزرەت وات: بەڵۍ عەجیب نادرەن
بەڵام حەقق وە گرد ئەشیا قادرەن
ئەگەر خوداوەند ئەی کارە کەرۊ
ئەلئان ئەو درەخت وەی جا باوەرۊ
بە واعیدی ئەو بدەن گەواهیی
ئیقرارکەن وە زات فەردی ئیلاهیی
حەزرەت فەرماوا: بنمانون پېتان
یەکسەر نادم بین جە کەردەی وېتان
موشریکان یەکسەر واتشان نەعەم
گرد یەکەن ئیقرار بە دڵ هەم بە دەم.[1]