ڤەنیسا و باڵندەکانی ماریۆ
#گوڵزار حەمە فەرەج#
دەستبردن بۆ چیرۆک، شیکردنەوەی کێشەکانی ژیان و ناردنی پەیامێکی مرۆڤدۆستی و چێژ بەخشینە بە خوێنەر، جوانترین نووسەرانی باش ئەوانەن بۆ کوێرەوەری مڕۆڤەکان دەنووسن.
ئەرکی چیرۆکنووس پێش نووسین خۆ بەخێوکردنە بەهۆشمەندی و وردبوونەوەیەتی لە قوڵایی ژیان، خۆپەروەردەکردن و هەوڵدانیەتی بۆ ئەوەی مرۆڤدۆستانە بنووسێت دوور لەهەر تێکەڵبوونێک بەسیاسەتی دەوڵەت و چەواشەکردنی خوێنەرەکانی.
پەڕتووکی ڤەنیسا و باڵندەکانی ماریۆ لەنووسینی جەلال عەبدوڵڵا ساڵح
کارەکتەرەکانی لە هاوکێشە مڕۆڤدۆستییەکاندا قسە دەکەن مڕۆڤەکان کۆچەرین و نامۆن و بەدوای ئومێد و ئاییندەی جوانی سبەینێدا دەگەڕێن، جەنگی نێوان کارەکتەرەکان جەنگی ئەو میراتیەیە کە سەرمایە و یاسای دەوڵەت و کاپیتاڵ دایناوە و لەسەری دەڕوات.
یەکەم ڕۆژی لەدایکبوونی هەر ڕۆح لەبەرێک خۆناسین و خۆڕاهێنانیەتی بەرەو ڕێگای کۆچکردن هەنگاو نانیەتی بەرەو دابڕان و ئاشنابوون بە نهێنییەکانی ژیان خۆڕاهێنانیەتی بەپەتای بیرکردنەوە و ئازار چەشتن لە ژیانێکی نابەرانبەرییدا کە بەسەریدا سەپێنراوە.
ڕووداوی ناو چیڕۆکەکانی ئەم پەڕتووکە لەیەک نیشتماندا نەوەستاوە بەڵکوو دەڕۆن و بەردەوام لە جەنگی ڕوبەروبوونەوەدان، کاراکتەرەکان هەموویان منداڵی کۆچ و غوربەت و دابڕانن، مڕۆڤی قاڵکراوەی نێو کێشە کۆمەڵایەتییەکان و چینایەتیەکانن، تێکەڵەیەکن لەدونیای ناوەوەی ڕوداوەکان و زامە قوڵەکانیان، ئەگەر مرۆڤی ناو چیرۆکەکان شێت و داماویش بن خۆیان نین بەڵکوو بەرهەمی شەیتانی دونیای ناوەوەی ئەو جیهانەن
کە تەنیا بیر لەکوشتن و جەنگ و برسیکردن و ڕاونانییان دەکەنەوە [1]