ناونیشانی بابەت: کەڕووی ڕەش
ئامادەکردن: د. #دیلان عارف عەلی#
هەوکردن بەهۆی کەڕووی ڕەشەوە چییە؟ ئایا مەترسیدارە؟ کێن ئەوانەی کە زیاتر ئەگەری تووشبوونیان هەیە؟
- بریتییە لە جۆرێک لە هەوکردنی کەڕوو بەهۆی گرووپێک لە کەڕوەوە کە ناسراون بە (mucormycetes) ، حاڵەتێکی دەگمەنە بەڵام تەواو مەترسیدارە.
- ئەم کەڕووە لە ژینگەی دەورووبەرماندا بوونیان هەیە، ئەو کەسانەی کە بەرگری لەشیان لاوازە یاخود نەخۆشی شەکرەیان هەیە و کۆنتڕۆڵ نەکراوە زیاتر ئەگەری تووشبوونیان هەیە بەم جۆرە هەوکردنە.
- هەروەها ئەوکەسانەی کە نەخۆشی ئایدز یاخود چاندنی ئەندامێکیان بۆ کراوە، یا سووتاویان هەیە ئەگەری تووشبوونیان زیاترە.
- ئەم جۆرە هەوکردنە ئەکرێت تووشی بەشە جیاوازەکانی لەش ببێت بەڵام باوتریان هەوکردنی جیووبەکان و پاشان دەگوازرێتەوە بۆ مێشک، ڕێگای گواستنەوەشی بەهۆی هەڵمژینی دەنکۆڵەکانی کەڕووەکەوەیە.
$نیشانەکان:-$
1- ئاوسانی لایەکی دەموچاو.
2- سەرئێشە و گیرانی لووت و جیووبەکان.
3- درووست بوونی پەڵەی ڕەش لەسەر پردی ناوەڕاستی لووت و بەشی سەرەوەی ناو دەم کە زۆر بەخێرای گەشەدەکەن و حاڵەتەکە قوورس دەکات.
4- تا.
- یەکێک لە مەترسییەکانی ئەم جۆرە کەڕووە ئەوەیە کە زۆر بەخێرای دەگوازرێتەوە بۆ بەشەکانی تری لەش وەک مێشک و سییەکان ئەگەر چارەسەر نەکرێت، دەرئەنجامی ترسناکی لێئەکەوێتەوە وەک:-
- هەوکردنی مێشک و سییەکان.
- شەلەلبوون.
- گەشکە.
- مردن.
- چارەسەری حاڵەتە لەلایەن پزیشکی پسپۆڕەوە دیاری دەکرێت بە بەکارهێنانی دەرمانی تایبەت بە دژە کەڕوو، هەندێکجار بڕیار لەسەر نەشتەرگەری دەدرێت بۆ لابردن و پاکردنەوەی ئەو بەشەی کە تووشی هەوکردنەکە بوون بەهۆی کەڕووەکەوە. [1]