بەشێک لە خەڵک واڕاهاتوون لە کەشی سارددا بێت یان گەرم، ڕاستەوخۆ دوای نانخواردن کوپێک ئاوی سارد دەخۆنەوە، بەڵام ئەگەر بێت و بزانن مەترسییەکانی ئەو خووە چییە، ئەوە دەستبەجێ دەستبەرداریی دەبن.
بەگوێرەی پێگەی ستێپ تو هیڵس، خواردنەوەی ئاوی سارد دوای نان خواردن دەبێتە هۆی بەدهەرسیی و درووستکردنی ئازاری گەدە، جگە لەوەی وادەکات جەستە چەورییەکانی بپارێزێت و کێشی جەستەی زیاد بکات.

باس لەوەشکراوە کە بڕی خۆراکەکە هەرچەند بێت، ئەوە ئاوی سارد پلەی گەرمییەکەی دەگۆڕێت و جەستەش لە پڕۆسەی هەرسکردندا ناچار دەبێت هەوڵێکی زۆرتر بدات، بەتایبەت ئەو خۆراکانەی چەورن، لەبەرئەوەی خۆراکەکە ڕەق دەبێت و بە خراپی هەرس دەکرێت، بەوەش چەورییەکە زیاتر کەڵەکە دەبێت و کێش زیاد دەکات.
هەرئەوەندە نا، بەڵکوو ئاوی سارد کاریگەریی هەیە لەسەر درێژکردنەوەی ماوەی پڕۆسەی هەرسکردن، ئەمەش وادەکات ترشەڵۆکی گەدە بگەڕێتەوە و کەسەکە هەست بە سووتانەوەی سوورێنچک دەکات.
هەروەک، خواردنەوەی بڕێکی زۆری ئاوی سارد ڕاستەوخۆ دوای نانخواردن کاریگەریی لەسەر ترشەکانی ناو گەدە دەبێت کە یارمەتیدەری تێکشکاندنی ماددە خۆراکییەکان و هەرسکردنیان، دواتر کەسەکە هەست بە قوورسیی و پڕیی دەکات. [1]