ساحیبان پامان...

میرزا ئۆلقاڎر دیسان باس جە نەهامەتی و فەقیری و دەردیسەریەکا وېش کەرۊن، بەڵام دمای بەیان کەردەی چن نەهامەتی و کەموکوڕیێش، بەیتەو(وزباشی دەخیل مستەوفی ئامان) دووەبارۍ و چن بارۍ کەرۊوە، دیارەن ئامای مستەوفی پەی لاو یان نزیکو میرزا ئۆلقاڎری سوود بەخش و فەرەح بەخشەن، پەوکەی میرزا چن جارێ ماچۊشۆ.
ساحیبان پامان ساحیبان پامان
لوتفتان چوون قەید شیەن وە پامان
مەیلتان بیەن ڕاگری ڕامان
وزباشی دەخیل مستەوفی ئامان
بەندە جە نوتفە تا حاڵ تەقریر
وەر بۍ گوناهم وەر ساحیب تەقسیر
تۊم ئیخلاسیم نە ڕووی دڵ‌ شەندەن
وېم وە کەمتەرین غوڵامان وەندەن
ئەر جە حکومەت وەر جە مەعزوولی
نە وېم چەنیتان هەرگیز فزوولی
دایېم ئایینەی خەیاڵتان بیم
شەوان تا وە ڕۊ نەقالاتان بیم
دیسان هەر بەندەم تا سەرگەی سامان
وزباشی دەخیل مستەوفی ئامان
ئەگەر کەم خدمەت وەگەر بیۍ کارەم
ئەر ساڵێ جە زەید، دووساڵ ئاوارەم
یا غەیر بەد ئەفعال بۍ شەرت و بەدخۊم
ئەر نمەک نەشناس وەر بۍ تانوو پۊم
ئانە نەهایەت نامرادیمەن
قەرینەی نگبەت خەیاڵ خامیمەن
فەقیری مایەی سەد عیلەت پېشەن
ئالەم جە تەقسیر دایم دڵ ڕېشەن
سا فەقرم جە سەر یاوان بە دامان
وزباشی دەخیل مستەوفی ئامان
تاقەت گیانم یاوان وە تاقەت
نە لادێ جە غەم مەبوو فەراقەت
نە خوڎا وە مەرگێ مەکەرۊم ئازاڎ
نە جە مەینەتان مەبوو خاترشاڎ
نە خوڎاجایە هەن پا بنیه و نە پېش
من بەرۊ وەسای پەنای لوتف وېش
پەس چار هەر ئېڎەن دیسان فەرار کەم
تەرک ماوا و زەید یار و دیار کەم
عەفوو کەن نەڕای بارگەی ئیمامان
وزباشی دەخیل مسەوفی ئامان
شەوان شەرمەندەی ئالو عەیاڵم
قووت لایەمووت نیەن جە ماڵم
دووغینە جەلام نەبات شارەن
شەلغەم خۊ پڵاو دوو شاخەدارەن
گۊشت خۊ گۆشت خووگ لانە ساران بۊ
نەڎیەنم مەگەر جەژن یاران بۊ
فەرشم خاک سەرد باڵینم سەنگەن
مەزاق یانەم هەر داوا و جەنگەن
دەروونم کەیلەن جە زوخ زامان
وزباشی دەخیل مستەوفی ئامان
ئەر جارێ شەیتان پەیم کەرۊ هەوەس
بەروون ناغافڵ پەی کەیوانۊ دەس
ماچۊ بیل هەوەس چەنی ڕووداری
یە پەی چی دانت وە پای بیۍعاری
منیچ وە بیۍدەنگ مەشوون وە جای وېم
عەرەق چوون سەیلات مەریزۊ نە جېم
وەختەن نگوون بۊ نامەم جە نامان
وزباشی دەخیل مستەوفی ئامان
با وجوود به و جوود خەیلێ دڵشادم
کەردەش نەمەندەن ئەسڵەن جە یادم
چوون خەسیای خەساس دەرد ڕەجاڵیم
تەڕی نەمەندەن جە ئەعزای خاڵیم
هەرچەند دڵ به و تەور مەڎۊم ستېزە
من خۊ نە هیجران وەختەن بوو ڕېزە
پەی بەدبەختی بەخت دایم هانامەن
نە قوەت نە زۊر نە تەوانامەن
نە هۊشتان مەنەن هەرگیز جە لامان
وزباشی دەخیل مستەوفی ئامان
ڕەفیقم خەیاڵ شەوبېداریەن
شەریکم شاخەی دەرد کاریەن
کەواوم کزەی دڵەی سەدپارەن
شەریکم هەر خەم بەزم پەژارەن
یادم مەیل گەرم دیڎەی پەڕدەردەن
ساقیم لوولەی وشک هەناسەی سەردەن
ئەرەستو دەستوور ئیفلاتوون فامان
وزباشی دەخیل مستەوفی ئامان
ڕەحمی کەن وە خەیر بەڎ حاڵەن حاڵم
نەجاتم بڎەن نە چنگ زاڵم
چارەم پەریتان سوبح ئەکبەرەن
جە عومرە و غەزا شەرفناک تەرەن
وزباشی سا تۊ ڕانەپی نەوی
حاجی ما قوڵ‌تەر تووخوڎا کۍ بی
با جەتی باڵای نەوتوڵ نەمامان
وزباشی دەخیل مستەوفی ئامان
سەد کەس جەی مەسکەن ئاسوودە حاڵەن
مەرفوع القەڵەم فارغ الباڵەن
منیچ سەدوویەک مەحسوب بداران
پېم فرە خاستەرەن جە لوای شاران
وەی زوخاو سەرد با فەرار نەکەم
وېم نە قاپیتان شەرمەسار نەکەم
ڕای چۊڵ تەقدیر وە قەریب نەکەم
جەستەکەی خەستەم گۆڕ غەریب نەکەم
با نەبوون وېنەی زومرەی عەوامان
وزباشی دەخیل مستەوفی ئامان
هەر کەس جەی دنیا داد و هاناش بۊ
چارەش هەر ئېڎەن تا تەواناش بۊ
واچۊ یا کەریم یا کەریم الله
یا عەبدالقادر یا حەبیب‌الله
میرزام بۊ بە عەشق حەبیب ئەکبەر
جە سای لوتف وېت مەئیوسم مەکەر
ئه و دەفتەر کە نام من نشتەن تېدا
سەرخامەی عەفووش باوەرە پېدا
بەشق ئەشق زوڵف خەیاتە خامان
وزباشی دەخیل مستەوفی ئامان
هام نە هیلاکەت دەرد گەدایی
قووت مەوت بیەن جە لام وە شاهیی
یا وېتان وە قین سەنگەسارم کەن
یا وە مەرحەمەت چارەی کارم کەن
یا جە مەغڵوبەی وېتان وېڵم کەن
یا تەماشای بەرگ شانوو پېڵم کەن
ئەر سەد کە قادر وادەی مەرگش بۊ
دایېم پەژارەی نان و بەرگش بۊ
عەفو کەن نەڕای بارگەی ئیمامان
وزباشی دەخیل مستەوفی ئامان.[1]