سزاو میرزای، جەفاو یارۍ، پەژارانی سەردی نیمەشەوان، دووری باڵای ئازیز، دېڎەی بېخەوان، وەسوەسەو خەیاڵان، قرچیای زامان، تاکو کەی؟
میرزا ئۆلقاڎر، گیرۊڎەو ئینېشاو چڼەها دەردا تەرین، ئاڎ بېجگە هانا بەردەی، پەنا گېرتەی بە خوڎای، بە حاجەت ئاردەی خوڎای،
هیچ عیلاجێش نېیەن، پەی ئانەی بۊش بنیۊ وە بۊی هەناسەی کاڵش، لەبی لاڵش بگېرۊ بە دەم، بنۊشۊ شەربەت سەرچەمەی زەمزەم، زوڵفانی خاوش بۋزۊ وە گەردن، مەر ئاوەختە بە حەراڵی و مەحرەمی، مەر ئا وەختە ئیتر پېسە وېش واتەن:
مەحرەم بوون وەتۊی یەخەی عەنبەربۊت
تەواف کەم باغچەی بەهەشت لیمۊت.
قیبلەم کەی تاکەی
قیبلەم کەی تاکەی، قیبلەم کەی تاکەی
هیجران باڵات کەی بۊ هەتا کەی
کۊی هەی خەم بەرکەرد، وە سەر نووک نەی
دەروونم بېیەن وە بەحری بېپەی
چەنی مەوج هوون ئەندېشەی دووری
وەسوەسەو خەیاڵ دەرد مەهجووری
توخوڎا سزای من جەفای تۊ تاکەی
دیای من پەی مەی، وەفای تۊ تاکەی
تووخوڎا قار و قین بېڕامی تاکەی
توخوڎا ناسەفا و ناکامی تاکەی
مانیای مەینەت بېهۊشی تاکەی
ئەلوەدای بېدەنگ خامۊشی تاکەی
پەژاران سەرد نیمەشەو تاکەی
ئەسرین حەسرەت هەم بېخەو تاکەی
مەینەت و ئەحواڵ مەزاران تاکەی
چوون مەجنوون تەکیەی موغاران تاکەی
کزەی دەروون تاو بېدەردان تاکەی
مەحروومی جەرگەی هامفەردان تاکەی
قرچیای زامان کۊنە و نۊ تاکەی
هەی فەریاد جە دەس زوڵم تۊ تاکەی
ماجەرای دڵ پاچ ناسازان تاکەی
مەعرەکەی مەینەت بەڎوازان تاکەی
پشتان پای سەنگ خار خەم تاکەی
پەی ئامای دەلیل چەم ئەو چەم تاکەی
دەرد کەس‌نەزان بەڎحاڵیی تاکەی
دەروېشی تاکو چەند عەوداڵی تاکەی
دەوای دەرد کەس‌نەزانی تاکەی
ڕاز نەهوفتەی نەهانی تاکەی
با بۊ وە عالەم ئاشکار تاکو کەی
بەڵ دیار حاس بۊ نادیار تاکەی
تا کەی جە دووری باڵات هەراس بام
تاکەی پەی دینت شەو بېخوراس بام
تاکەی من مەجنوون کۊی دووجەیلت بام
تاکەی وە تەمای وەفا و مەیلت بام
تاکەی ئینتزار ڕېزەی ڕازت بام
تاکەی داخ نە د ڵ غەمزە و نازت بام
تاکەی لەنگ و لاڵ لېوی لاڵت بام
تاکەی حەبس دام زوڵف و خاڵت بام
تاکەی بناڵوو وەی دەرد کاری
تاکەی پیشەم بۊ فەریاد و زاری
چېش واچوون چەنیت هەی وەلەد غەزاڵ
شۊخ نەساسڵ ئاهووی خوتەن ماڵ
توخوڎا تۊ کەی بۊ قەدەم باوەری
تاریکی یانەی دڵ ڕۊشن کەری
کەی بۊ من و تۊ بنیشین وە هەم
من چوون پەروانە تۊ بە وېنەی شەم
کەی دەستەی زوڵفت بووزوو نە گەردەن
واچوون وەش ئامای دەرمان مەردەن
کەی مەبۊ لاڵت بگیروو نە دەم
بنۊشۊ شەربەت سەرچەمەی زەمزەم
ببۊسوون وە شاڎ گۊنای گوڵنارت
لەب چەش کەرو سەیف خاس خونسارت
مەحرەم بوون وەتۊی یەخەی عەنبەربۊت
تەواف کەم باغچەی بەهەشت لیمۊت.[1]