لەیلۍ مەجنوون کەرد
بەشۊ یەکەمۍ
میرزا ئۆلقاڎر، تازەگەریێ زەریفش خولقنان، گەر وەڵتەر عاشق دېوانەو شەیدا و مەعشووقېن، گەر مەجنوون خەم نەکۊڵ و ئەراگېڵی دەشت و کۊن، گەر فەرهادی تەشی بە دەس خەریکەن نەقشی شیرین نە سەنگ مەنەخشنۊ، ئەچېگەنە پېچەوانەن، ئانە لەیلېنە بېدارەنە، خەمش تەنیایی مەجنوونییەن، گەرەکشەن بلۊنە خزمەتش، نەک هەناسانی سەردش بگېرۊش، ئایېرو دڵەی پەڕ دەردیش بسۊچنۊش.
لەیلۍ مەجنوونی جەستەی مەجنوون کەرد
شەوێ لەیلۍ مەیل جەستەی مەجنوون کەرد
چەم پەڕ جەدانەی ئەسرین هوون کەرد
تاسەی فەراوان قەیس زەبوون کەرد
خاڵان پەژموردەی ڕووی پیشانی کەرد
زوڵفان ئاستەی کوڵف پەرېشانی کەرد
یەقەی ئەتڵەس پۊش پارەپارە کەرد
ڕاِزان فەراوان بېشمارە کەرد
کاڵای حەریر تا، ماڵا نە باڵا
نە لەنجەی باڵا نە عشوەی کاڵا
واتش هەی یاران هەی کۊسی کەفتەم
هەروەکوو ئاهیېر سەرتا پا سوفتەم
هەی دەرد کاری دەرمان بېزەکەم
هەی هەناسەی سەرد سەحەرخېزەکەم
هەی ئاخ ئاخ سەخت شەوان بېداریم
هەی ناڵە و فغان هەی شین و زاریم
هەی زوخ زوخاو زامەت نۊشی وېم
هەی وەی باڵای ناز قەتران پۊشی وېم
هەی شاڎیی بەتاڵ هەی زوخاڵی وېم
هەی خەریک دەرد ئاهوو ناڵی وېم
خاسەی خاڵ‌خاسان زوڵف عەنبەرینان
جەیران ڕەفتاران ڕاز شەکەرینان
یاران هام‌سەران دۊسان دڵداران
خوېشان ئەقرەبان جەرگەی نازاران
یەکسەر تەڵەب کەرد ڕوخسەت بڎەن پېش
بشۊ وە سەروەخت مەجنوونەکەی وېش
ڕوخسەت بڎەن پېم تا بشوون وەلاش
با گیان شیرین بکەروون فەڎاش
بەڵکوو خوداوەند قار نەگیرۊ لېم
کەمێ ئیمانیچ عەتا کەرۊ پېم
نەوای بگېرۊم هەناسەی سەردش
سۊچنۊم (ئایېر) دڵەی پەڕ دەردش
نە خودا بەردارەن نە ڕەسووڵ ڕازی
نە فتوای شەرعەن نە حوکم قازی
ئینە چەندساڵەن گرفتارمەن
شەیدای زوڵف و خاڵ عەنبەر بارمەن
شېت و ئەراگېڵ باڵ بەرزمەن
چەمیدەی قامەت عەرعەر تەرزمەن
زامڎار موژگان ئەڵماس نېشمەن
لۊنگ مەدهۊشی مەینەت کېشمەن
سەودای گۊنای گوون گۊنا گوونمەن
زامار شامار زوڵف کەتوونمەن
کوشتەی نەزاکەت غەمزە و نازمەن
................ قودرەت ساز مەن.[1]