لەیلۍ مەجنوون کەرد
بەشۊ یەرەمۍ
دمای ئانەی لەیلۍ جە دووجەیل، وېش نامنارە ملوو قەیسی وەشەویسیشەرە، مەجنوون ئاما وە گوفتار، ئەسرینان جە چەمش مەڕېزان، ماچۊ: ئەی لەیلۍ، پەی ساتێ جە هیچ یاگێنە قەرارم نییەن، ڕاحەتم نېیەن، هەردەم داخمەن پەی دووری تۊ، شینو زاریمەن پەی باڵای تۊ، فرەش وات، ئیتر لەیلۍ جوابش داوە، ماچۊ: مەجنوون گیانم بۊ فیدات، خەیلێ گفتوگۊشان مەکەرد.
جەودەمدا مەجنوون ئاما وە گوفتار
ڕېزا ئەسرینان چوون سەیل وەهار
ئاماوە جواو خەستەی پەڕ جە دەرد
واتش هەی لەیلۍ سای گەردەن بېگەرد
ساتێ نە جایە قەرارم نییەن
ڕاحەتی جەستەی بیمارم نیەن
کەردەنم وە زەید کۊی هەردی دوجەیل
هەر ئاخ داخمەن پەری دیڎەی لەیل
شەو مینگەم کەفتەن نەپای موغاران
بیەنان وە قەیس دەیری کۊساران
پۊشانم نە فەرق بەرگ سیامەڕ
پەرۍ باڵای لەیل، شۊخ خاتر تەڕ
گا جۊش و خرۊش ناڵە وېنەی نەی
گا ماچوون یا دۊس، گا یا هو، یا حەی
گا مەست بادەی ساقی ڕووی ئەلەست
گا ئینتزاری ئەجەڵ پەرۍ قەست
گا شېخ، گا سۊفی، گا نیمە دەروېش
گا بېزار جە مەیل گرۊی قەوم و خوېش
لەیلۍ من مەجنوون ئەراگېڵی تۊم
لەیلۍ من سەرعی شېوەی ۋېڵی تۊم
لەیلی من لۆنگ پۆش سیابەرگ تۆم
لەیلۍ من زامدار لەت‌لەت جەرگ تۊم
لەیلۍ من کەم فام پەشېو هۊش تۊم
لەیلۍ من بیمار ژاراو نۊش تۊم
لەیلۍ من مەشهوور خاس و عام تۊم
عاشق وە شېوەی گوڵ ئەندام تۊم
لەیلۍ من ئەوگار تیر قار تۊم
لەیلۍ من مەجنوون گرفتار تۊم
لەیلۍ من کوشتەی لەنجە و لارەی تۊم
دڵ وە ئېش نېش پارەپارەی تۊم
(القصە) یاران تا چەنی ۋیەرد
لەیل چەنی مەجنوون گفتوگۊشان کەرد
لەیلۍ وات مەجنوون گیانم بۊ فەدات
مەجنوون وات: لەیلۍ دیڎەم ها نە ڕات
لەیلۍ وات: مەجنوون بېڎار بەر جە خاو
مەجنوون وات: لەیلۍ بۊ زووخاو
حەیران بی جە (صنع) دانای زول‌جەلال
ئیمانش ئاوەرد ئه و بە لایەزال
یە چەتر خاڵان میقراز لەیلۍ
یە ئەبرۊی چوون قەوس شیراز لەیلۍ
یە تاتای موژگان شەڕخېز لەیلۍ
یە مەودای ئەڵماس هوون ڕېزی لەیلۍ
یە گۊنای بېگەرد چوون لاڵ لەیلۍ
یە پرشەی ڕوخسار زولاڵ لەیلۍ
یە دیڎەی شاباز پەڕناز لەیلۍ
یە ئیشارەی عەین دڵواز لەیلۍ
یە بیینی چوون ئەلف پەڕگار لەیلۍ
یە بەرزی دەماخ خوون کار لەیلۍ
یە زنج چوون تۊپ تەڵایی لەیلۍ
یە ساقی گەردەن مینایی لەیلۍ
یە لەوح سینەی چوون عاج لەیلۍ
یە جوفت نارنج ڕەواج لەیلۍ
یە دېوبەند لاڵ نەباڵ لەیلۍ
یە دەست و پەنجەی شمشاڵ لەیلۍ
یە ناف ئاهۊی مشکین لەیلۍ
یە بۊی هەناسەی عەترین لەیلۍ
یە باڵای چوون سەرو نەمام لەیلۍ
یە تووڵ قامەت ئەندام لەیلۍ
یە عیشوەی شیرین بەناز لەیلۍ
یە دیڎەی مەخموور شاباز لەیلۍ
یە خڕەی بازن خرخاڵ لەیلۍ
یە سەر لفکەی شۊڕ دەسماڵ لەیلۍ
یە ڕیشەی دڵ کېش پووشین لەیلۍ
یە کاڵای باڵای ڕەنگین لەیلۍ
یە دیبای زەڕین زەڕبافت لەیلۍ
یە ئەسڵ مەعدەن نایافت لەیلۍ.[1]