$هاوڕێم، ئێمە لەسەر جادەی قیرین$
#کاوە ئەمین#
#05-08-2016#
چەند ڕۆژێک دوای ئەوەی گوندی موفتی بە خوێنی چەند پێشمەرگەیەک لە دەستی #داعش# ڕزگار کرابوو، بە خزمەت شەهید لوقمان و پێشمەرگەکانی دیکە گەیشتین. نزیکی نیوەڕۆ بوو، پلەی گەرما خۆی لە پەنجا پلە نزیک کردبووەوە. کاک لوقمان بە خۆی و سمێڵە گەورەکانییەوە لەگەڵ چەند پێشمەرگەیەکدا، سادە و ساکار، بە گەرمی بەخێرهاتنیان کردین. ئەگەرچی ئەوە سەرەتای یەکتربینینمان بوو، لێم پرسی: کاک لوقمان تۆیش کاکەییت؟ بەپێکەنینەوە گوتی: دیارە بە سمیڵە زلەکانمدا تێکەوتوویت، ئەدی نەتبیستووە، ئەوەی سمێڵی سوور بوو هەمزاغا نییە؟
نەخێر ناوەڵڵا، کاکەیی نیم و #چەمچەماڵ#یم، بەڵام بە خۆشحاڵییەوە، گوندی شەبەک و کاکەییەکان دەپارێزین، گرنگ کورد و کوردستانە!
لەگەڵ پێشمەرگەکاندا زۆر هاوڕێیانە هەڵسوکەوتی دەکرد، زیاتر لە خێزانێک دەچوون کە هەموو چاویان لە دەمی براگەورەکەیان بێت، نەک یەکەیەکی سەربازی، جێگاو ڕێگای پشوودان، خواردن و جل و پێڵاویان هەموو لەیەک دەچوو، تەنیا ئەوە نەبێت هەندێک جار بە گەورەم بانگیان دەکرد و سەرشانی شەهید لوقمان داڵێک و دوو ئەستێرەی بەسەرەوە بوو!
دەیویست بست بە بستی گوندە ئازادکراوەکەمان پیشان بدات، دوای ئەوەی لایتێکی گەورەیان هێنا، هەر خۆی پێشمان کەوت بۆ ژێرەزەمینەکانی داعش، یاخود تونێلەکانی داعش کە لە چەند لایەکەوە وەکوو مشکە کوێرە کونیان کردبووە زەویەکەوە و ژێر ماڵەکانیان کردبووە تونێلێک کە بەراستی سەرمان سوڕما. هێشتا بۆنی ئەوانی لێمابوو، ژووری بچکۆلە و بەتانی و سەرین و فەردە خورماکانیان هێشتا لە جێگاکانی خۆیاندا بوون، بەڵام پێشمەرگە هەموو تەقەمەنییەکانیان بووچەڵ کردبووەوە کە لە دوای خۆیان بەجێیان هێشتبوو.
کاک لوقمان وەکوو چاوساخێکی کارامە وەکوو چۆن گایدێکی شارەزا مۆزەخانەیەک نیشانی گەشتیاران بدات، ئاوا بەوردی باسی تونێلەکانی داعشی بۆ دەکردین و دەیوت ئەم وڵاتە جێگای ئەم بێگانانەی تاسەر تێدا نابێتەوە. بەناو تونێلەکاندا ڕۆیشتین تا لە ناو خانوویەکدا خۆمان بینییەوە کە خاڵی پێکگەیشتنی تونێلەکانی داعش بوو.
ئەگەرچی ئەو لە بەردەمی کامێرادا هیچ قسەیەکی بۆ نەکردین بەڵام ئاریان هەموو هاتوچۆکانمانی بەکامێراکەی تۆمارکردبوو، بۆیە کە خەبەری شەهیدبوونی کاکە لوقمان لە فەیسبووک بڵاوکرایەوە، جارێکی دیکە سەیری ڤیدیۆکانم کردەوە، کاکە لوقمان وەکوو پاشای دەشتی نەینەوا دێتە پێش چاو.
داعش تەنیا چەند کیلۆمەترێک لەوانەوە دوور بوو، گوندی موفتی کرابووە جێگای حەوانەوە و ناوەندی سەربازی هێزەکەی کاک لوقمان، ئەوان لە حوکمی قەناس بەدەستەکانی داعشدا بوون، بۆیە زووزوو بە پێشمەرگەکانی دەگوت: ئاگاتان لەخۆتان بێت! ئاخر ڕۆژێک پێشتر گوللە هاوەنێکی داعش لە بەردەم ساترەکانی پێشمەرگەدا تەقیبووەوە و شوێنەکەی دیاربوو.
تا دەهات پلەی گەرما بەرزتر دەبووەوە، ئێمەش لەگەڵ چەند پێشمەرگەیەک و کاک لوقماندا لە یەکێک لە سەنگەرەکاندا پشوویەکمان دا و داوای چا و ئاویان بۆ کردین، بەڵام من هەستم بە شەرمەزاری دەکرد لە بەردەم پێشمەرگەکاندا کە مەرگ لە هەموو چرکەیەکدا میوانیانە، چایەکەم نەخواردەوە، بەڵام بەراستی ئەوان مەرگیان شەرمازار کردبوو، ئەوەی ترس بوو لە دەموچاویاندا بەدی نەدەکرا یان وەکوو زۆرجار نەنکم لە پێداهەڵگوتنی پێشمەرگەدا دەیوت “کون لە جەرگیاندا نییە”.
ئەگەرچی کات دەرۆیشت و بەرەو ئێوارە دەبووینەوە، بەڵام هێشتا خۆر بەرپێی پیشمەرگەکانی ڕووناک دەکردەوە و وەکوو ئەوەی دڵی نەیەت بەجێیان بهێڵێت، نەوەک لە تاریکیدا شەمشەمەکوێرەکانی داعش زەفەریان پێبەرن.
کارەکەی ئێمە کۆتایهات و دەبوو خاتروخوازی لە کاک لوقمان و پێشمەرگەکانی بکەین، باوەشمان بەیەکدا کرد، دەتوت سەد ساڵە یەکتری دەناسین بەپێکەنینەوە گوتی “کێ دەڵێت ڕۆژێک پەنجەمۆرێک ناکەین”؟
هێشتا زۆر دوورنەکەوتبووینەوە، زەنگی مۆبایلەکەم لێیدا، کاک لوقمان بوو، سەرەتا وامزانی شتێکمان لەبیرچووە، بەڵام ئەو بە دەنگێکی پیاوانەوە پێ گوتم، ویستم بزانم گەیشتوونەتە سەر جادە قیرەکە، نەوەک ڕێگاتان لێ هەڵە بێت و ببنە میوانی داعشەکان!
چەند جارێکی دیکە بەتەلەفون قسەمان کردەوە، بڕیار وابوو لەگەڵ کاروان و ئاریان شەوێک بچینەوە بۆ لایان و ژیانی شەوێکی پێشمەرگەکان تۆمار بکەین، بەڵام ئێوارەی 28ی تەمووز، زەنگی تەلەفونێک تاساندمی، هەواڵی شەهیدبوونی کاک لوقمان بوو، هەواڵێک شەهیدبوونی باوکمی بەبیرهێنامەوە کە لە خەویشدا قسەیەکی نایەتەوە یادم، بەڵام ئەو گفتوگۆیەی نێوان شەهید لوقمان و کچەکەی کە بەتەلەفون قسەیان دەکرد و ئێمە گوێمان بۆ شل کردبوون، ڕەنگە هیچ کاتێک لە هزرمدا نەسڕێتەوە.
کاکە لوقمان بە کچەکەی دەوت کە دیاربوو لێی تورەبوو کاتێک کاژێر چواری بەیانی چەند ڕۆژێک پێشتر بەجێی هێشتبوو و دڵی نەهاتبوو خەبەری کاتەوە:“دەی کچم، بەو بەیانییە زووە دڵم نەهات خەبەرت بکەمەوە، ئەی نازانیت جەژن بەڕێوەیە و منیش کە مووچەکەم وەرگرت دیاری جەژنت بۆ دەهێنم، نابێت لێم تورەبیت”. نازانم دوای ئەو گفتوگۆیە، منداڵەکانی بینییەوە یان نا، بەڵام ڕەنگە ئێستا تەنیا من بزانم هەستیان چۆنە، بێ باوکی چەند دەردێکی بێ دەرمانە.
نە فریاکەوتم بەدیداری کاکە لوقمان شادبمەوە، نە پەنجەمۆریشمان کرد، بەڵام ئەوەی دیارە و وەکوو سەروەرییەک بۆی دەمێنێتەوە، ئەو بە خوێنی خۆی پەنجەی لەسەر نەخشەی وڵاتەکەی مۆرکرد، نەخشەیەک ئەگەر درۆزنەکان لەوە زیاتر لەتوکوتی نەکەن، ڕەنگە خوێنی کاکە لوقمان و باوکم و هەزارانی دیکە، سەرلەنوێ درووستی بکەنەوە.
خوات لەگەڵ هاورێ، ئێمە لەسایەی خوێنەکەی تۆەوە لەسەر جادەی قیرین و ترسمان نییە. [1]