تاریخو ژیوای پیرەکا هۆرامانی:
پیرشالیاری یەکەم:
چن سەرچەمۍ باسشان جە تاریخو ژیوای پیرشالیاری یەکەمی کەردەن، دلېشانە جیاوازی مەپېویۊ:
جە دەسنوېس (سەرەنجام) ینە نویسیان: پیرشالیاری یەکەم نامېش (خواداد کوڕو جاماسپی هۆرامی) ن، سەڎەو پەنجەمی کۊچینە جە هۆرامان پېڎا بېیەن.
ڕەشید یاسەمی جە کتېبو (کرد و پیوستگی نژادی و تاریخی) ینە نویستەنش: یۊ جە موغانەکا زەردەشتی جە هۆرامان بېیەن، نامېش (پیری شالیار) بېیەن، شۊنیشەرە کتېبێ جیامەنەن بە نامۍ (ماریفەتو پیری شالیار) ی کە بەشێ فرەش مۊچیاری و قسۍ نەستەقېنۍ.
موزەفەر خانو ڕەزاوی جە کتېبو (پاسداران مرز ېیران-تاریخ اورامان) کە بە زوانی فارسی نویستەنش: پیرشالیار نامېش (باوا مستەفا کوڕو باوا خوادا) یەن، کە یاوان پلێوە باڵا جە ماریفەتی.
محەمەد بەهائەدین مەلا ساحیب جە کتېبو (پیرشالیاری زەردەشتی) نە نویستەنش: پیرشالیار کوڕو جاماسپی هۆرامین، سەرو دینو زەردەشتی بېیەن.
د. سدیق بورەکەیی جە کتېبو (تارېخوی وېژەی کوردی- بەرگی دوەم) نویستەنش پیرشالیاری یەکەم جە کەشە سەربەرزەکا هۆرامانینە پېڎا بېیەن، سەڎەی پەنجەمی کۊچینە ژیوان.
پیرشالیار دمای وېش کتېبێوەش شۊنیرە جیامەنەن بە نامۍ (ماریفەتو پیرشالیاری) کە بە زوانی هۆرامی نویسیان، پېسە کتېبو (ئاوېستای) بەند بەندەن، لاو زەردەشتیەکاوە پیروزەن، یۊوە جە بەندەکاشەنە فەرماوانش:
ۋەروێۋە وارۊ ۋەرۋە ۋەرېنە
وەرېسە بڕیۊ چوار سەرېنە
کەرگی سیاوە هېڵە چەرمېنە
گۊشڵۍ مەمېڕیۊ دوە بەرېنە
ڕیش چەرمەکۍ پاسە جە مەبەسو پیرشالیاری یاوێنېنە کە خەبەرش دان بە ئامای دینێ تازەی کە (ئیسلامەن) ، یانی دینێ تازە پېڎا بۊ گردو دینە وەڵینەکا شۊرۊوە، دمای کۊچی دمایېنو پېخامئاوەرەکەیچش چوار یاگەگیرۍ (خەلیفۍ) یاگېش گېراوە. دیسان چەنی کەرگەی سیاوە هېڵۍ چەرمۍ کەرۊن، هەر پاسە پېخامئاوەری پاک دلۍ قوڕەیشیە بت پەرەسەکانە پېڎابۊ، مروڤیچ دمای مەردەیش، یان بەهەشتیەن یان جەحەڼەمی.
ساڵانە پەی یاڎو پیرشالیاری جە (شارو هۆرامانی) جەژنەو پیرشالیاری کریۊن، سەرو مەرقەڎەکەیشۆ مەراسیمەکە ملۊ ڕاوە.[1]