وەختوو وېش خانای قوبادی کە شاعېرێوی مەشهوورا جە دنیاو ئەدەبېیاتیەنە، دوۍ بەیتۍ شېعرە ئەپی مەزموونە ماچۊ :
بەرق سەیف ناز ئەبرۊ خەمینان
عەکس ماوی خاڵ خورشید جەمینان
ئەر بگنۊ وە کۊی قوللەی قەرزاڵە
مەکەرۊش وە بووڵ سفتەی سەڎساڵە
دماتەر میرزا عەبدوڵڵای پاوەی کە نازناموو شېعریش (مەحرووم) ی بېیەن، بە چوار بەیتۍ ملۈ پېواو شېعرەکاو خانای قوبادیەوە و کیانۊشا خزمەتوو مامۊسا مەولەۊی، تاکو بەراوەردشا کەرۊ و نەزەروو وېش جە بارەشاوە فەرماوۊ. ماچۊ:
بەرق بریقەی ناز عیشوە فرۊشان
چەخماخەی لەنجەی تەڵا نەگۊشان
پزیسکەی نیگای دیڎە شابازان
بریقەی غەمزەی شەکەرین ڕازان
ئەر بگنۊ وە سەنگ جای تەجەللای نوور
مەکەرۊش وە گەرد چوون سورمەی کۊی توور.
مەعدووم، ڕاس(خانا) سۊزانی عەشق بۍ
کەی وېنەی (مەحرووم) هەر عەشقی مەشق بۍ.
مامۊسا مەولەۊیچ پی شېعرا جوابشا مڎۊوە:
نەوباوەی خېیاڵ (مەحروومی) دانا
ڕەدیف لەتیف زەریف (خانا)
یاوا وە دیڎەی کەم بینام ساوا
جە نەو بینایی پەی دیڎەم یاوا
پەیرەوی (خانا)ت یاڎ ئاوەردە بۍ
ئاڎ ئەسڵ و وېت فەرع حەساو کەردە بۍ
لاکین، زادەی تەبع بۊ عەنبەرینت
دەس ڕېسەکەی فیکر، بیکر شیرینت
پەسەندیدەی فام ئاوەزدانا بۍ
خاستەر جە خېیاڵ خاسەی (خانا) بۍ
زیاڎە پەی فەرع، وە سەر ئەسڵەڎا
خاسەی واتەی تۊن جەی سەرفەسڵەڎا[1]