Nûstık: HEKATÊ KILMİ
Nustekar: Hüseyin Çaglayan
Çapa Yewine: 2017
Çapxane: Kalan
Herune : Dersim
YOMOSE VE XIDIRI RA
Payiz bi. Dar u birr renga reng xemliay bi. Zerd, ceqer, sur, gewe têwerte de bi. Asmenê serê birri ki cor de sewle hewz dene birr u Hardê Dewreşi. Rengi, tabiat, çoğrafya je resmê şinatkarė Rönesansi bi. Rengi, tabiat u Hard u Dewreşi germ bi, hama hawa serd biye. Ison endi serde çiyenê. Her keşi ciletê xoyo zi- mistoni ontené xo ser. Se bikerê? Serd bi, puk bi. Vore corde nişt bi vilê kou ser de. Kou binê vora sipiye de vile ro nênay bi, hama rengê xo vurnay bi. Sipe kerdenê. Vore eve serd u puki xo beli kerdenê. Hukmê xo hata Yomos Xatune rusnay bi.
Yomos Xatune ki binê quluki de verê lozina xo de quncil bibi. Hetê veri tani, hama hetê pey serd guretené. Xoxo de murnené, vengê xo araze nèamanê ke, savana. Yemose nalané, hem ki xori nalené. Hiştiriye ver de çarcê verê wela lozine biyenè. Dezê xo esto, hama nézonena ke dez koti ra yeno. Nala, nala Yemose biye.
Kes çê de çine bi. Yemose teyna biye. Dewr dewrê Kenan Evreni bi. Zalım serd ra tenena beter bi. Isoni piriznené ra. Ey Yemose ki piriznay bira.[1]