لاچەمېوی گولانە سەرو کتېبوو (ژیان لە بازنەی ڕووداوەکاندا)
بەشۊ: هەشتەمۍ (دمایین بەش)
پەی قسێ ئاخری:
ئینە کە من سەرو ئی کتېبیە نویسەنم جە ڕاسیەنە قەترێوا جە دەریای. ئی کتېبە تەنیا ویرەوەری نویسەری نېیا کە هەرچی سەرشەرە ئامان واچۆش و باسش کەرۊن، بەڵکوم ، ویرەوەریێ خەڵکانێوتەریەنێ کە بە حەکایەتێ و داستانێ وەشی و ناوەشێ گېڵیاوە. بڕېو چا داستان و بەسەرئامایا ئاندە دڵتەزێنێنێ، کە هەڵسی مارا چەمۍ وانەریەرە. فرێچشا ئاندە وەشێنێ، کە دڵوو وانەری شاد کەرا و وانەری مارانە خوە.
نویسەر چی بەشیچەنە فرە موەفەق بېیەن.
جە بەشوو گلێر کەردەو زانیاریەکا و سەرچەماکانە، نویسەر هیچ کەمش ناردەن و سەرکۆتە بېیەن.
بەشوو فرە موەفەق ئی کتېبیە ئا یاگێنە کە نویسەر هیچ شەرم و تەعارفێوش چەنی کەسی نېیا و ئانە کە ئەژنەویەنش و دیەنش باسش کەرۊ. پەی نموونەی وەختێو باسوو قەرەسەنی دەگاکێ وېشا کەرۊ، بێجگەم ئانەیە کە باسوو ڕەنج و ئازارەکا و شادی و وەشیەکا کەرۊ، جە پاڵیچشانە باسوو ئا داب و نەریدە قیزەونا کەرۊ کە خەڵکەکە گیرۆدەشا بېیەن. ئی ڕاسگۆیە جە سەرتاسەرو کتېبەکەیەنە گنۆ وەروو چەمی. نویسەر پېسە نویسەرێوی ئەمانت داری وېش مژناسنۆ پەنەما و تاکو ئاخریچ پا ئەمانەت داریشە وەفادار مەنۆوە.
هەرپاسە سەرۆ عەرزم کەردیدێ، ئی کتېبە ڕۊمان نېیا تاکو من ویر و ئەندیشەو نویسەری وزوو وەروو نەقدی و واچوو چا بەشەنە مەشیێ پاسە بیێ و پاسشە کەردێ، بەڵکوو ئینە تەنیا ویروەریێنێ و قسێ ئەوەگېڵیێنێ کە باس کریا.
ئینە پا مانا نېیا کە ئی کتېبە جە گرد بارێوەرە گردچېوەنە تەماما. ئەر کتېبێو جە گرد لایەنێوەنە، تەمامبۊ، ئاوەختەنە کە تەمام نیا. چوون هیچ چېوێو نە موتڵەقا و نە پڕفەکت.
بۊنەو ئانەیۊ من چېگەنە ئەریچ ڕخنێومبۊ، تەنیا سەلێقەییا و کریۆ پاسەیچە نەبۊ.
هەرپاسە سەرۆ باسم کەرد، ئا شێعرێ کە بە زوانی مەحەلی کە سەرچەمەکەش زوانو گردو مەنتێقەکەیا، پەنەواز نەبۍ هۆرگېڵیاوە بە سۆرانی.
داستانێ وەشێ و حەکایەتێ چی کتېبەنە، ئاندە فرێنێ و سەرو یۆی گېڵیاوە کە مەجالوو ویرکەردەی بە وانەری مەدا تاکو لەزەتی عاڵشا چەنە بەرۆ، هەڵای تاموو یۆیشا ئینا دەمەنە کەچی یۆتەر بە زوویی دەس پەنە کەرۊ و وەڵینەکەت ویر بەرۊوە.
ئی شێوە جە ڕۊمانەنە هەن و بە هەرمانە ملۆ. جە ڕۊمانەنە چا یاگێنە کە نویسەر هەس کەرۊ ڕۊمانەکەش ڕوەو زاییفی ملۆ، پەی ئینەیە وانەر نەمانیۆ و نازۆجیا، لکێوەتەرە مدۆ تاکو وانەری بە تەماو کەردەیش جە پاراگرافی دماتەرەنە بازۆوە تاکو نەتۆریۆ.
بەڵام چېگەنە نویسەرو ئی کتېبیە فرەو داستانە وەشەکا سەرو یۆی باس کەرۊ و مەجالوو بەینەکەیشا فرە کەم منیۊرە، هەر پابۊنۆ، ئیتر وانەر فرە بە ئاسانی حەکایەتەکا پێوەرە تێکەڵ کەرۊ.
ئی لا و ئۆ لا کەردەی چی کتېبەنە جار جار گنۆ وەروو چەمو وانەری. بڕېو یاگێنە نویسەر نموونێوی وەش پەی ڕووداوێوی مارۆوە کە یاگە گیرا و لەزەت بەخشا، بەڵام هەر واز نمارۆ و یەک یا دوێ نموونێتەر مارۆوە کە درێژە کېشۆ و چانەیەنە وانەری ماننۆ.
ڕانویسی و ویراستاری ئی کتېبیە من مدەو دەسو پسپۆرا و زوان زانا و پرۆفێشيناڵا زوانەوانی، ئانە ئاڎۍنێ کە ویر وڕاو وېشا مشیۊ سەرش بنویسا.
ویر وڕا و ئەدیشەو نویسەری:
ئەر من ئی نویسەرمە نەژناسێ، پاسە ئەژناسنێنېش بە شمە.
جە فرەو واچەکا و بابەتەکا ئی کتېبېیەنە، ئەندیشەی یەکسانی وازی بەرابەری ژەن و پیای و ئیدەی سووسیالیستی، جە قسەکاو نویسەریەنە بەر گنۆ.
پەی پاگرتەی سەرو ئی قسێ، نموونێ فرێم سەرۆ باس کەردێنێ.
جە پاڵو ئی ئەندیشەیەنە، تاق و تراقیچ قینەی کوردانێ وەراوەر بە داگیرکەرا کوردسانی، بە ئاشکرا دلێ قسەکاشەنە پیویۊ. جار جاربۊ بە خەموەروو هەر چوار پارچەکەو کوردسانی و ئاواتوو کوردسانېوی گەورەی موازۆ و داوا جە پسپۆڕا زوانی کەرۊ تاکو هۆڵ دا پەی وەش کەردەی زوانێوی یەکگرتووی کوردی. نەقڵێ قۆڵ
ئاخرین واچە:
ئی کتېبە ئێژایی ئانەیشە چەنەن کە وەختش پەی بنیەیدێرە و بواندێشۆ، ئارەزوو سەرکۆتەی و ساقی و سڵامەتی پەی نویسەری کەروو.
ڕەزا بەهمەنی.[1]