کەسابەت، یام پاشېل کەردەو مافی گردی؟
جە سەردەمو ئارۊینە چەنی ژیوای و هەلس و کەوت دلێ کۊمەڵگاینە حەکایەت جە ویر و ئەندیشەی تاکی و گردی کەرۊ. کۊمەڵگایە جە یاساو ژیوای سەردەمیانەی شاڕەزا نەبۊ و بە بەکگراوەندی کۆن چی سەرڎەمەنە گەرەکشبۊ ژیوای بەرۆ سەر دایېم توشوو گرفتی و گرفت و خشوونەت و توند وتێژیبۊ و پەی تاکە یاسامەندەکا و پەنەیاوا و ژیرەکا ڕەنج و زەحمەت پېشکەش کەرۊ و باقی کەساتەریج ئاسایېش و ئەمنیەت... چەنەشا سەلببۊ. وەختارێ منی شارەوەند تەنیا ئامانجم بە دەس ئاوەدەی زەڕ و سەرمایەیبۊ و بە نێسبەتوو ئاوەدانی و ڕازیایەو شارەکێم ورکە و داڵغەم نەبۊ، دیارا کە سیمای وېرانی و تاڵانکاری و ئێلمانی شاری ڕوو بە دماکەوتەیی و ئازار و ئەشکەنجەی ڕۊحی و جسمی پەی نیشتەجایاو ئا شارەیە مێ وەرەوە. مێسداقی و بە نممونە باس کەرمۍ، کابرای میکانیک یامبۊنگاداروو ماشینی، یاگێ ئاما و لوای خەڵکیش گېرتێنە و جە ئەو پەڕوو بۍ موبالاتی ئازارەی فیزیکی و ڕۊحی یاونۆ ئەو شارەوەندەکا وسیماو شاریش تێکە دێنە، ئەریچ بە ئەدەبېیاتی شیرین و لەفزی موحتەرەمانە ماچیش پەنە کاکە ڕاو ئاماو و لوای خەڵکی مەبەسە، یام ئەو پەڕوو کەمتەر خەمی و بۍ موبالاتینە کەکێ مێمانەش مەبۊ یام جە ئەبزاروو خشونەت و بۍ ڕېزی کەڵکە بەرۆ و ڕایە یەرۆمە کە مشۊم داواو بەخشای کەرۊ و حورمەت بنیۆرە پەی ئا دەنگە مەبارەکەیە، ئەسڵەن جە تەرح و پلان و باوەڕشەنە مەگونجیۆ کە وەرچەم گېرتەو مافی گرڎی نېشانێ گەورەیی و هەویەتوو ژیواو سەردەمین.
ئیسە کە لایەنە وەرپرسەکاو شاری کەمتەر خەمێنێ بە نێسبەتوو ژیواو ڕوانەو خەڵکی و بە وینگای پەشۆکیای خەڵکی ڕەسالەتوو وېشا مەبەرا ڕاوە، با منی شارەوەند و ئاوەزمەند نەگنونە دام و پلانەو بەدنام کەردەو شارەکەیم، جە حەنناو وېمەنە ڕاو ئاماو لواو خەڵکی نەگېرو و ڕەنج و زەحمەتوو خەڵکی فرەتەر نەکەرو.
بەیدۍ با پێوەرە بانگەوازوو شاری بۍ گرفتی و شارەوەندی ئاوەزمەندی بەرزە کەرمۍوە تاکو تاومۍژیوایە پوختە، کەمتەر ڕەنج و مێحنەت بەرمێ سەر. مشۊم من پېسە شارەوەندێ جایگا و یاگێ وېم بشناسوو و بە نێسبەتوو سیمای بۍ گەرڎەو شارەکەیم هەست بە وەرپرسیاری کەروو. پا ئاواتە.[1]