ڕومان نویستەی جە وېژەن کەردەی سەختتەرەن
بەشۍ: یەرەمە
نویستەی: #هەورامان ڕۆستەمی#
زەمانوو داستانێ:
زەمانوو ئی داستانێچە کەم کېشێنە، پەی نموونەی کاک حەمەڕەزا دلێ ڕۊمانەو سیاوڕێحانەیەنە هەڵێوی زەمانی گەورەش کەردەبۍ، بەڵام دلێ چنارەیەنە دیارا فرە بە وردی سەرنجوو هەرمانەکېش دان و من هەڵێوی زەمانیم نەڎی.
مەکانوو ڕۊمانێ:
هەرپاسە کە ئەوەڵوو ئی بابەتیەوە نویستم مەکانوو ئی ڕۊمانێ نویسەر ئاشکرا مەکەرۊ و نامۍوە نەژناسیاش پەی مارۆ بە نامۍ چنارەی، بەڵام یۊ پېسەو من کە هۆرامانوو لهۆنی پېسەو یانەو وېما مژناسوو، وەختێو باسوو چنارەی کەرۊ، ڕېک دەگاو شۆشمێ گنۆ خیاڵم، یا وەختێو باسوو سەرقەڵای کەرۊ، ڕېک ئێجۆ ئینانێ دەوروو مێڎانوو شاروو نەوسووڎێ. نامۍ ڕۊمانێ فرە مۆهێمەنە، من یاگێ نویسەریەنە بېیەیانێ ئێحێماڵەن نامۍش نیێنێ هۆرامان یام حەر شۆشمێ، ئێتر ئینە حەر پاسە وەڵتەر عەرزم کەرد، سەلیقەیین.
کشمکش داستانی: گېرە و گرفتو داستانێ:
گەورەتەرین ڕیسک و قۆماروو نویسەری چی ڕۊمانێنە کە بەڕاسی فرە قۆمارېوی سەخت بێ، ئا وەختەنە کە شەخسیەتوو پەروانەی مرۊ، وانەر ماوێوا عاڎەتش کەردەن بە داستانەکێ و پڕ بەدڵ لوانەنە دلێ داستانەو وەشەویسی ئەنوەر و پەروانەی و وېش وستەن دلێ گێچەڵاوەکېشا وجە ناکایېوەنە پەروانە مرۊ و فرە مدریۆ دلێ زەوقوو وانەریەوە!!من ئێحساس کەروو ئینە زەعفێوی گەورەن پەی نویسەری کە فرە دڵوو وانەرەکەیش مارۆ! بازی کەرۊ بە ئێحساساتیش و مۆدام بە درام و بە گێچەڵە و بەبۊغز و نائاسۇڎەی بازۆشەوە و دڵوەشش نەکەرۊ.
من وېم پېسەو وانەرێوی پەی ماوەو یەک ساعەتی کتېبەکەم نیاوە لاو فرە دڵم ئېشا بە مەرگو پەروانەی، بەڵام چوون هەوڵم ئانە بۍ کە داستانەکێ بوانوە درێژەم دا پەنە و ئێحتێماڵش هەن وانەرێوبۊ چەولایش نەوانۆوە و دڵزەڎەبۊ جە ڕۊمانەکێ، پەوکەی من پنەش ماچۊ قۆماری گەورەو نویسەری!
ماوێو ڕۊمانەکێ جە ئا شوور و هەیەجانیە گنۆ، بە تایبەت ئاوەختە ملا پەی لۆڕستانی و داستانەو ئاشنایی گۆڵنارێ و زەماونش، داستانەکێ فرە دوورە گنۆوە جەمەحاڵوو هۆرامانی و کەمېوتر مڎۆ دلێ زەوقوو وانەری و هەر چن نویسەر چی ماوەنە تەوەجۆش ئینا سەرو داستانەو وڵکڵە یام فەرهادیەوە، بەڵام مشیۊم نویسەر هاگاش چانەیبۊ کە ئېمەی وانەر ماوێوا ئینایمێ دلێ چنارەیەنە و چنی ئا خەڵکیە مژیومێ و بە دەنگو مەڵڵا عۆسمانی وبۊڵەبۆڵوو حەلیمێ عاڎەتما کەردەن، یەک لەحزە گردی مازمێ جیاو سەر جەلۆڕستان بەر مارمێ.[1]