با خەڵک بېیاوۊنە
مدېوە فرەن بەشداری فرەو چالاکی و ئەژناساو کتیبی و کۆڕو سیمینارا کەرو جە هەڵەبجەو دۆرو پەشتشەنە، بەداخۆ فرەو یاگانە مژنەوۊ کە فرێ جە نویسەرو ڕوشنویرا ئینە ئینا سەرو زوانیشاوە کە فەرماوا با خەڵک بیاوۊنەو چېوەکەی بە زوانێ تەر شیکەراوە، جە وەختێنە فرێ جە هام شاریاما ماچا کاکە چی بە زوانو ویتا قسی مەکەردی تاکو ئیمەیچ فیری بیمۍ، یۊ چا ڕاگیریا کە فرێ جە خەڵکی فیرو زوانێ تەری نمەبوو قسە نەکەردەین پا زوانەیە، وەشڵەی هۆرامیچ زوانی تەرشا نەزانێ تاکو هەر بە زوانو ویش هەرمانی و ئەژناسای کتیبی و چالاکیی تەرېشا بەرڎێنی ڕاوە، تەماشە کەردێ بزاندۍ هیچ کەسێ تەر بە شیوەزوانو ویش زیاتەر یام بە زوانو ویش زیاتەر قسی کەرو، هیچ کۊنیشت و کۆبوونەوێنە؟ کەچی ئېمە نەک بە زوانو ویما قسی نمەکەرمی، پەیلواو وېچما بە زوانێ تەر ماچمۍ، جە وەختێنە ئا وەشەسیا کە پەرسەکېش وەنە کەرمۍ هام زوانو وېمانە، یام جوابو هامزوانو وېت بە زوانێ تەر مڎوە، من چېگەنە گەرەکم نېیەن مەسەلەکۍ پاسە بەرۋزو بڕێ وەشەسیای بە وېشا یاوانە یان بەراش ڕایێ تەرەرە، تەنیا گەرەکما بزانو چی کە هۆرامیۍ هەڵەبجەو هۆرامانی پېسە هۆرامیەکا یاگەکا تەری بە زوانو ئەڎایی ویشا کۆڕۍ و سیمینارۍ نمەبەرا ڕاوە، ئینە شەرما یام نەزاناین؟
ڕێبوار هۆرامی.[1]