نامۍ: تۆفیق بەگ
نازنام: پیرەمێرد
نامۊ تاتەی: مەحموڎ ئاغا
ساڵۊ پېڎابېیەی: 1876ز
ڕۊ مەرڎەی: #19-06-1950ز#
یاگۊ پېڎابېیەی: #گۆیژە_ سلێمانی#
یاگۊ مەرڎەی: #سلێمانی#
$ژیۋاینامە$
تۆفیق کوڕو مەحموڎ ئاغای کوڕو هەمزاغاو مەسرەفین، نازنامو (مەسرەفی) چانەیۊ لکان پۊرەش کە دلۍ حکومەتو بابانەکانە پېسە شالیاری و شالیاری دارایی فەرمانداریش کەردەن، یانی هەرمانەو سەرفیاتو زەڕی و گەنجو دۆڵەیش بەردەن ڕاوە. پیرەمێرد ساڵەو (1876ز) گەڕەکەو گۆیژەو شارو سلێمانی جە ئەڎێ بېیەن.
تەمەنو شش حۆت ساڵینە وزیانەنە چېرو وانای، دماتەر پېسە فەقی دلۍ مزگی هەمزە ئاغاو بابایشەنە دەرزش وانان.
بەشێ فرەو مزگی و خانەقاکا کوردەسانی گېڵان شۊنەو زانست و ماریفەتیرە، دماتەر چەنی شېخ سەعیدی حەفیدی ساڵەو (1898ز) لوان پەی ئەستەمبووڵی، چاگە بەشو یاسایش تەمامنان، دلۍ چڼین بوارا دەسەڵاتو عوسمانینە جە ئەستەمبووڵ هەرمانەش کەردېنە. سەردەمو خېزیای شوڕشو شېخ سەعیدی پیرانی ساڵەو (1925ز) و تېک شېیەی بارو زرووفی، پیرەمێرد گېڵانۆ پەی سلێمانی، ئیتر چا تاریخۆ دماوە خەریکو هەرمانەی فەرهەنگی و ئەدەبی و ڕۊنامەوانی بېیەن. پیرەمێرد بەرهەمێ دوڵەمەڼش جە شېعرۍ جېیائاستەن پەیمان، بەشێ فرەو بەرهەمەکەیش (واتۍ وەڵینا) نۍ کە جە قاڵبو شېعرانە متېنېشەرە، ئانەیچە هەرچن هەرمانێ ناوازېنە، پارېزنای قسۍ و واتە قەڎییمیەکامانە کە بە ئاسانی دلێ مەژگو هەر تاکێ کوردینە مەناوە.
حاجی تۆفیق بەگ سەرەڕاو زوانی ئەڎاییش، زوانەکانو عەرەبی و تورکیش بە خاسی زانان.
(غەزالە خانە) نامۍ هامسەرەو پیرەمێردی شاعېرینە، بەرهەمو هامسەریچشا دوۍ زارۊڵۍ بە نامەکانو (نەژاد و وەداد) ین.
پیرەمێرد سەرەتا دلۍ شارو سلێمانینە سەرسام بۍ بە شېعرەکا نالی، بەڵام وەختێ بە فەرمانو میری ساڵەو (1883ز) کیانیا پەی هەڵەبجەی، چاگە پېسە فەرمانبەرو زەمین و زاری دەسبەکار بی، بە حوکمو نزیکیش جە ناوچەو هۆرامانیۆ، لوانە دلۍ دنیاو شېعرۍ هۆرامیۍ، مەبۊن بە مېمانو مەدرەسەو شېعرەو هۆرامی، ئەچاگە ئاشنا بی چەنی شېعرەکا بېسارانی و مەولەوی و خانای قوبادی، ...هتر، دمای گېڵایۆش پەی سلێمانی مشتێ جە خەرمانو ئا مەدرەسەیشە هۊرگېڵنا پەی سەرو شېوەزوانو سۆرانی، چوونکوم ئا شېعرۍ مەدرەسەو هۆرامی داراو ئاوازی بېنۍ، دەسو هونەرمەڼ و گۊرانی واچەکاشا لا یاواو کریێ بە گۊرانیۍ.
ئی گۆهەرو ئەدەبو کوردییە جە تاریخو (19-06-1950ز) تەمەنو (83) ساڵینە، دلۍ شارو سلێمانینە کۊچی دمایینش کەردەن، سەرو وەسیەتو وېش (گردەو مامەیارەی) ئەسپەردە کریان.
ئەسعەد ڕەشید.[1]