بەیاڼامەو پلاتفۆرمو هۆرامی سەرو دیارنەمەنی دوۍ گەنجا خەڵکو هۆرامانی جە ڕاو مېیانو وەڵاتو فەرەنسەی و ئینگلستانی
ڕاپۆرتێ جە ڕاوەبەری پڵاتفۆرموو ھەورامی سەرو دیار نەمەنەی چن پەنابەرا خەڵکوو دەگاو ( خانەگاو پاوەی ) کە بە ئامانجو یاوای بە ئنگلیسی چەنی چن کەسا تەری دابېشا ئاوەکێ مابەین و فەرانسەو ئنگلیسی:
یاگێ باسینە بەپاو ئا پېوەڼیا چەنی پۆلیس و مەڕزی فەرانسەی ، بیمارستان و شارو کالی و چن ڕېکۋزیە کە پەێ پەنابەرا بۍ وەراوەر ھەرمانە کەرا تاکو ئی وەختە دما خەبەرێ پی جۊرە سەر ڕاس کریانەوە.
ڕۊ جمعەی حەفت قایقێ بە ئامانجوو یاوناو پەنابەرا بە شێوەی قاچاخ جە فەرانسە ڕوە ئنگلیس وزیەنێ دەریا، بە داخەوە یۊ چا قایقا سەعات یەک و پانزە دەقێقێ سەرساحبی جە مەرزی ئاوی فەرانسەینە کە ھەشت کیلومترێ جە قەراغ و ئاوێ دوور گنۆوە بە بۊنەو سەر وستەو شەست و شش پەنابەرا پێوەرە و خرابی ئاو و ھەوای بنەش تەقۊ و سەرنشینێ قایقەکەی گرد گنا دلێ دەریای.
بەپاو قسێ خەدەمەو کەشتیوە کە نزیکشابۊ و ڕوەداوەکۍ وینا، نیمەی فرێشا ھیچ جاکەتێ نەجاتیشا وەرەنە نەبېیەن، جە لاو کەشتیەکەیۆ یەرێ قایقێ نەجاتی پېشا فڕە مڎا دلێ ئاوێ. ھاموەخت کاپیتان و کەشتیەکەی ڕاپۆرت و ئاژەکەی کیانۆ پەێ پۆلیسی دماو (15) دەیقا ھەڵەکۆپتر یاوۆ یاگێ کارەساتەکەی.
گردو ئا کەسا کە وەروو چەماوەباو پولیسی وینێنێ، ڕزگار کریا. چن کەسێ کە ئاژەشا فرە خراببۊ یاوناشا بیمارستان، بە داخەوە جوانێ خەڵکوو حاجیاواو قەلادزێ بە نامۍ ( ڕاوێژ ) کە جەنازەکەش جە لاو دوێ مامۆزایاشۆ سەر ڕاس کریانۆ بە مەردەیی یاوناش بیمارستان. ئاژەو ژەنێ و کورەکەیش و ھەر پاسە چن کەسا تەری بە خراب باس کریۆ و تاکو ئی ساتەوەختەیچ ئینێ بەشی تایبەتەنە.
بەپاو قسێ چن جە ڕزگار کریایەکا دوێ ھام وەڵاتییە خەڵکوو دەگاو خانەگاو پاوەی بە نامەکا ( ھیوا موستەفایی و نیما شاسواری ) چەنیشا بېیەنێ، بەلام بە داخەوە تاکو ئی وەختە ھیچ خەبەرێشا چەنە نیا. پەی دەس وستەو خەبەرێ سەرو ئی دوە ھاموەڵاتیا بە کیاناو نامۍ و عەکسشا، پولیس و مەرزی فەرانسەی و ئنگلیسی ئاگادار کریەنێوە.
پولیس ئانەشە سەر ڕاس کەردەنەوە کە تاکو ئی وەختە ئامارێ ڕاس پەی ئانەی بزانا چن کەسێ جە دلێ قایقەکەینە بېیەنێ نیا، تاکو ئارۊیچ ھیچ ڕاپۆرتێ کە باس جە بیەو لاشەو کەس یا کەسانێ کە سەرو ئاوێوە یا قەرەخەکا مەرز و فەرانسەو ئنگلیسی و وینیەبا نەدریان.
دماجار پسۆ پڵاتفۆرمو ھەورامی بەشوو بەروو وەڵاتی بە ئەرکو وېما زانمێ پەی ئانەی خانەواڎەو کەس و کارشا وېشا بە تەنیا نەوینا، بە گرد جۊرێ ھەمیارێشا بیمێ پەی ئانەیە کە خەبەرێ جە وەشەویسەکاشا دەس وزمێ.
ڕاوەبەری پڵاتفۆرموو ھۆرامی.[1]