گوفتمانی کوردی و ئەوەژیونای زوانی هۆرامی
بەشۍ: یەرەمە
با بەڵگەکێ قسێ کەرا
دەهەو هەشتایەنە بە پەرە ئەسای فرەتەروو ڕۊتوو هۆرامی نویستەی، حۆت داستانێ بە هۆرامی نویسیەی یا هۆرگېڵیەیوە کە چانېشا، لای کەم نویسەرێو چواریشا کە ئېمە مژناسێمشا، سۆڼەتوو کوردایەتیەنە یاوەینێ بێنێ پنە و بە دەرەجاتی جیاواز چیروو کاریگەری گوفتمانی کوردیەنە بېیېنۍ (ڕەئوف مەحموود پور بە دوێ داستانێوە، عەبدوڵڵا حەبیبی و کوروش ئەمینی)
دەهەو هەشتایەنە، بەپاو تارېخو نەسری هۆرامی، یاڼزە وتارێ بە زوانی هۆرامی چاپ و وەڵای بیېوە کە لای کەمی، تاکو یاگێو ئېمە شناختما جە نویسەرەکاشابۊ، چوارشا (4) جە لاو ئا کەساوە نویسیەنێ کە سۆڼەتی کوردایەتیەنە پنە یاوەینێ یا باوەڕشان بە گوفتمانی کوردی هەن (ڕەئوف مەحموود پور، محەمەد ڕەشید ئەمینی و کورۆش ئەمینی, سەباح جەباری). چی ساڵانە پەی ئەوەڵین جاری نامۍو یۊ چا کەسا کە دماوە ڕۆتوو گۊرانیسمیەنە ئەژناسە کریەی، پېسەو نویسەرو وتارێوی بە زوانی هۆرامی، گنۆ وەروو چەما (داریوش ڕەحمانی)
جە کۆتاییەکاو دەهەو (1380)یەنە پەی ئەوەڵ جاری چنڏ کتېبێ بە زوانی هۆرامی نویسیەی. بە گردی چوار کتېبێ نویسیەی کە یەرێشا (باقی سەففاری یەک کتېب و کورۆش ئەمینێ دوێ کتېبێ)، جە لاو باوەڕمەنداو گوفتمانی کوردیۆ نویسیەینێ. کتېبوو شازادە وەشڵەو کورۆش ئەمینی کە بە جۊرانێو متاومۍ واچمێش ئەوەڵین کتېبێوا کە بە زوانی هۆرامی نویسیان، ساڵ (1388)ی وەڵا بیۆ. جە ئەژناسەو ئی کتېبېیەنە ئامابێ کە هۆرگېڵیانەو سەرو کوردی هۆرامی.
ساڵەو (1390)یەنە پەنج کتېبێ بە هۆرامی نویسیەینێ (جە لاو محمەدی مۆستەفازادە، نەشمیل مەحموودی، سبحان ئەمینی) کە من زانیاریم سەرو کاریگەری گېرتەی ئیجابی و مۆستەقیمیشا جە گوفتمانی کوردایەتی نیا، بەڵام ئاشکران تاکو ئیگە نامۍو هیچکام جە ئا کەسا کە ئارۊ بە گۊرانیست مژناسیا، پېسەو ساحێبوو کتېبی چاپ کریای بە زوانی هۆرامی نېیەنە!
مودەڕڕیس سەعیدی.[1]