کورد دلۍ چەرخەکا تاریخینە
بەشۍ: سەڎ و حەفتا و پەنجەمە
نویستەی: #هاوڕێ باخەوان#
ساڵەو (1855ز): چن تۊمارێ پېوەس پی ساڵېوە ئینێ وەردەسەنە:
* شۆڕشو یەزدان شېری ئەچی ساڵېنە ۋران.
* ئەچی ساڵېنە ژمارەو هېزەکانو یەزدان شېری جە سەرنیشتو کوردەسانینە یاوێنۍ سەڎ هەزار چەکدارۍ.
* مانگەو (1) ئی ساڵېنە، دلۍ شارو بەغڎاینە سوپێوە دژو شۆڕشەکەو یەزدان شېری گلېرۍ کریێوە، هەر ئەچی مانگېنە زیاتەر جە سی هەزار کەسا جە کوردەکا چواردۆرو ناوچەکانو موسڵینە ڕاپەڕیێ، هەر ئەچی وەختەنە شۆڕشگېڕەکۍ یەزدان شېری تاواشان شارو موسڵی ئازاڎ بکەران.
* تاریخو (30-01-1855ز) تورکەکۍ پەی ئانەی شارو بەدلیسی جە شۆڕشگېڕەکا پارېزنان، بڕێ جە هېزەکانو بایەزیدیشان فاڕێوە پەی ئاگەی.
* مانگەو (2) ئی ساڵېنە، ژمارەو کوردە خېزیاکا چېرو دەسەڵاتو یەزدان شېری یاوێ شەس هەزار نەفەرۍ، بڕێ سەرچەمېچ باسو سەڎ هەزارا مەکەران.
* مانگەو (4) ئی ساڵېنە، یەزدان شېر داواش جە فەرماندارەکانو هېزەکانو یەریڤانی کەردە بلان ڕوەو مووش، دماییچ پەی بەدلیسی بگنا جووڵە، تاکو چاگە چەنی هېزەکانو ڕووسی دژو تورکەکا یۊبگېراوە.[1]