کورد دلۍ چەرخەکا تاریخینە
بەشۍ: دوەسەڎ و سی و یەرەمە
نویستەی: #هاوڕێ باخەوان#
ساڵەو (1908ز):
* شېخ عەبدولقادر کوڕو شېخ عوبەیدوڵڵای شەمزینی، ئەچی ساڵېنە بېیەن بە سیناتۆر دلۍ ئەنجومەنو عوسمانینە و دماتەر بېیەن بە سەردارو ئەنجومەنی.
* دەسەو وەڵاکەردەو زانیاری کوردانی جە ئەستەمبوڵ، فېرگێوەش پەی زاروڵا کوردی جە ناوچەو (چەنبەرلی تاش) جە ئەستەمبوڵ مەرزنارە.
* ئەچی ساڵېنە، شۆڕشو تورکە لاوەکا تورکیای تەخت و تاراجو سوڵتان عەبدولحەمیدیشان بنۆ هۊرتەکنا.
* ئەچی ساڵېنە، شۆڕشو مەشروتەی دلۍ تورکیاینە خېزیان، کارێ فرەش جە ژڵېوەو کوردایەتی جە سەرنیشتەنە کەرد.
* نیمەو یەکەمو ئی ساڵۍ، گورج وگۊڵی داگیرکاری تورکی دلۍ وەرکۆتو کوردەسانینە پەرەش سانا.
* پایېزو ئی ساڵېنە، بەشێ جە هېزەکانو حەمیدی بە دەسو تورکەکا چەکۍ کریێ.
* شۆڕشو ناوچەو دەرسیمی، ئەچی ساڵېنە خېزیا، تا کۊتاو ساڵەی دمایېنۍ درېژەش کېشا.
* وەهارو ئی ساڵېنە، پېوەڼی میانو سوارەی حەمیدی و سوپای نیزامی تورکی تېکشییەن.
* خېزیاکەو بەدلیسی ئەچی دساڵېنە پەرەس سانان، خېڵە کوردەکاچ کۊمەک کەردەن.
* ئەچی ساڵېنە، سورەییا بەدرخانە پەی چاپکەردەی ڕۊنامەو کوردەسانی گېڵێنۆ پەی ئەستانەی.
* بە دەسوەڵی ڕۊشنۋیر و کۊششکارا، دلۍ دیارتەرین شارەکانو کوردەسانینە چن یانێ مەرزیێرە، چانېشا دلۍ شارەکانو بەدلیس، دیاربەکر، موش، ئەرزەڕۆم، موسڵ، دلۍ یانەو بەدلیسینە تاکو کۊتاو ئی ساڵۍ (700) کەسۍ دلېشەنە وېشان نامنویس کەردەبۍ.[1]