پێنج خشتەکی لەسەر شیعری #مستەفا بەگی کوردی#
وەرن یاران ئەجەل ڕەهبەرمە ئەمشەو
فیراقە ئەووەڵی ئاخرمە ئەمشەو
خەیاڵی بەزمەکەی قەیسەرمە ئەمشەو
«#سەدای سەمتوورە کەللەم گەرمە ئەمشەو#
چریکە و بانگی دڵ بێ شەرمە ئەمشەو»
تەبیعەت بەرزە زاهیر گەرچی پەستم
نەوەی ئەو شێرەکەی ڕۆژی ئەلەستم
لە باڵا بۆ بەڵا پشتێن ئەبەستم
«بە نینۆک کاری فەرهاد دێ لە دەستم
وەها شاهوولە سینەم نەرمە ئەمشەو»
شەوی هیجرە دڵم زامار و مەحزوون
دەروونم ئاگری بەردایە گەردوون
نەماوە ڕاحەت و عەقڵ و سەبر چوون
«لە تەنیایی بە یادی ڕۆحی مەجنوون
خەیاڵی گەشتی دەشت و دەرمە ئەمشەو»
لەسەر عەقڵ و لە دڵ ڕاحەت کە دەرچن
ئیتر نامینێ فەرقی ژین و مردن
حەقی وایە کە عاشق دەربەدەر بن
«ئەگەرچی یار و یاوەر بوونە دوژمن
غەمی بێ یاری بوو یاوەرمە ئەمشەو»
ڕەقیب و ناحەزت مەسروور خەندان
ڕەفیق و دۆستانت مات و حەیران
منیش سووتاوە جەرگم بۆتە بریان
«لەسەر ڕووم زامی ناخوون نەخشی تۆی بەست
تەمای سنعاتەکەی ئازەرمە ئەمشەو»
بە کوشتن عاشقانت کرد سەرەفراز
منت هەر هێشتەوە بۆ عیشوە و ناز
وەکوو کەو خۆی دەکا حەمدی فیدات باز
«سەرم شۆری ویساڵی کەوتە سەر باز
دیسان کوردی کە دەردی سەرمە ئەمشەو»
پەرتووکی: #دیوانی حەمدی#
هۆزانەوان: #حەمدی ساحێبقڕان# [1][2]