ئەوێک ساڵانێک «سیزیف» ئاسا بوو..
تاشەبەردەکەی گەیاندە لوتکە و
لەناو پێدەشتی ئۆقرە و ئومێددا..
برینانەکانی قەتماغەیان بەست
جێگەتنۆکی فرمێسک و خوێنی بوونە گوڵزار و
کراسی بەری کە هەورێک بوو ڕەش پەڵەی سپی دا..
پەلکەزێڕینەی کرد بە دوو بازن بۆ مەچەکی دەست
***
ڕدێنی خەفەت ناهێڵێتەوە..
شووشەی مەیەکەی بۆ دوور تووڕ داوە
ئێستا هاودەمی نەغمەی هوزارە و
لە ژوورەکەیا.. تا دە هێلانەی شەمشەمەکوێرەی تێک و پێک داوە
دڵی پۆڵایە..
پەپولەی خەندە، گوڵی لێوی ئەو بەجێ ناهێڵێ و
دنیای ڕوانینی هەردەم شۆخ و شەنگ
ئاوازە زەردە پاییزیەکانی لە یاد کردووە..
گەرووی کەیلی لە هەزاران هەزار بەستەی ڕەنگاوڕەنگ
***
ڕەنگە بپرسن.. چۆن وا گۆڕاوە؟.. نەمامی حەزی تازەی ناشتووە
با پێتان بڵێم.. چونکە باڵاکەی وا لەژێر خاکا و..
یەک دوو ڕۆژێکە کە خۆی کوشتوە[1]
هۆنەر: #محەمەد عومەر عوسمان#
پەرتووکی: #لە غوربەتا#
ڕۆژی: #1985-06-28#
شوێن: #هەولێر#