کورد دلۍ چەرخەکا تاریخینە
بەشۍ: دوەسەڎ و نەوەڎ و یەکەمە
نویستەی: #هاوڕێ باخەوان#
* تاریخو (#27-10-1920#ز.) شۆڕشو گەرمیانی خېزیان، جە پانیشتو کوردەسانی بە سەرداری ئیبراهیم خانو دەلۆی دژو ئینگلیزەکا.
* ساڵەو (1921ز.): چن تۊمارێ پېوەس پی ساڵېوە ئینێ وەردەسەنە:
* ئەچی ساڵېنە، شاعېر مەحمووڎ پاشاو جافی کۊچی دمایینش کەرڎەن.
* ئەچی ساڵېنە، فۆڕی تاریخنویس ئانەشە دییۆ هەکە ئاشوورییەکۍ باسو تاریخو مادیشان کەرڎەن.
* ئەچی ساڵېنە، پێمانێ میانو فەڕەنسای و داگیرکاری تورکینە مۊرە کریان، کە یەرۍ ناوچۍ جزیرەی و کورد داغ و عارەب پینارشا لکنێ سووریایرە.
* ئەچی ساڵېنە، پېشەوا قازی محەمەڎ هامکاری شۆڕشەکەو سمکۆیش کەرد.
* ئەچی ساڵېنە، موحەمەڎ موکری تاریخنویس جە کرماشان ئامان دنیا.
* هونەرکاری وەشنویس سەی موحسن ئەچی ساڵېنە بە دنیا ئامان.
* ئەچی ساڵېنە گۊرانیواچ قاڎرو حاجی حسێنی ئامان دنیا.
* ئەچی ساڵېنە نویسەر عومەر عەبدولڕەحیم دلۍ شارو سلېمانی ئامان دنیا.
* مارف بەرزنجی نویسەر، ئەچی ساڵېنە ئامان دنیا.
* ئەچی ساڵېنە، مینۆڕسکی کتېبو سەرەنجامی ئەهلو هەقیش بە زوانی ڕووسی وەڵاکەرڎەنۆ.
* ئەچی ساڵېنە، ئا. کریستنسن و م. بینیدیکتسن کتېبێشان سەرو شېوەو ناوچەو هۆرامانی وەڵاکەرڎەنۆ.[1]