کاشییەکۍ
هامسێ پانیشتو گۆتی و لۆلۆییەکا بیېنۍ، ناوچەو لوڕستانو ئیسەینە نیشتەجایۍ بیېنۍ، زوانی کاشی پېسە زوانەکانو تەرو چیاکانو زاگرۆسی و کوردەسانی کۊنی بە زوانی هیندۆ ئەوروپی کارش وەنەکریان، کە جە سەرەتاو هەزارەی دووەمی وەڵۍ پېڎایی زاڵبییەن سەرو زوانو ناوچەکەیرە.
ناوچەو لوڕستانی زېد و ماوای ڕەسەنو کاشییەکان. بەرکۆتەی کاشییەکا جە هەزارەی دووەمی وەڵۍ پېڎایینە پەرەش سانان، بەهۊ کار و کاسبیشاوە، چانېشا دروونایۆ خەلەی. ژمارەو کاشییەکا دلۍ وڵاتو بابلینە ڕووەو زیاڎی لوان، بەڵام کاتێ مورسلیسی یەکەم، پاڎشاو حیپییەکان جە (1569 و.پ.) پەلامارەو بابلیش دا و کۊتاش بە حوکمڕانی بنەیانەو حاموڕابی ئارد، بۊشایێ سیاسییە دلۍبابلینە پېڎا بییە، کاشییەکۍ ئی هەلېشا قۊستۆ و حوکمشان دەس گېرت، پەی ماوەو زیاتەر جە چوار سەدا (1959-1162و.پ)حوکمڕانی وڵاتو بابلیشان کەرد. وڵاتو بابلی چېرو سایەو حوکمڕانی کاشییەکانە جە جەنگ و ئاژاولا دوورکۆتۆ و لوانە چېرو سایەی ژیوایێ ئارام و سەقامگیری، کاشییەکۍ چڼیین بەرکۆتۍ شارەسانیېشان ئاردېرە بابل، پېسە بەکارئاردەی ئەسپ و عەرەبانەی.
کاشییەکۍ دمای سەقامگیری ڕۆشو گردینی وڵاتی، شارێ تازەشان بنیاڎنیا تاکو بکەراش بە پایتەختو وېشان، نامېشان نییان (دورکوریکالزو) بە نامۍ پاڎشاکەیشا (کوریکالزوی دووەم)، دمامەڼەو ئی شارەیە ئارۊ مەگنۊ وەرنیشتو شارو بەغڎای بە نزیکەو 23 کم، پەنەش ماچان (عەقرقوق).[1]