چی هیچ کام ئی خەیرێشا نەکەرڎېنە تاکو خوڎا دورێشا نەوزۊوە
نەتۆ کەردت خەیر نە منیچ خەیراتێ
تا خوڎای وستیمێ هەر یۊ وڵاتێ
ئایا عیشق و وەشەویسی و پەی یۊ بېیەی ئانەی نمارۆ خەیرو خەیراتێش پەی کەری؟
ئەی عاشق مەواچۊ من هەرچیم هەن مڎەوش ڕاو ئانەینە تۊم بۊ، ئەی ئینە چی نەکریاو چی هەر یۊشا کەوت وڵاتێ؟
فۆڕمە گشتی و یاواینە سەتحیەکە ئانەن کە پەی حاسڵ بېیەی مرادێ ئەر خەیرو خەیرات کەری ئیمکانو ئانەی فرەن خوڎا مراڎەکەیت حاسڵ کەرۊ، پەوکای کوردەوارینە ئی خەیرو خەیراته کریۆ پەی حاسڵ بېیەی مورادی.
دەی ئی دوې ئەر یۊشا وەش مسیێ چی ئی خەیرو خەیراتەشا نەکەردو هەر یۊشا کەوت وڵاتێ.
عاشقی ڕاسەقینە گەرەکش نییا چیوێ بەرو یارەکېشۆ بۊ بە مەڵامەتکار تاکو یارەکېش بۊ بە نسیبیش یان بۊ بە هۊکارو پەی یۊ بېیەیشا، وە گەرەکشا یارەکېش پاک و پوخت ماڵۆرە جە هەرچی چیوی دەرەکین، ئەر پەیش بېیە با هیچ چیوێ نەبېیەبۆ بە هۊکارو ئانەی پەیش بۊ وەشەویسیەکە نەبۊ، یان ئی لا ئا هۊکارە ئشۆم بەسیابۆ وېشۆو بەشێ بۊ جە بوون و وېش..
دلې عیشقیچنە یان مەبۊ خەیرو خەیرات کریۆ یان کە کریایچ ئشۆم چیوەکە وېش بۊ بە بابەتو خەیرەکې.
ئانەیچ بابەتو خەیرەکېن وەشەویسیەکەن، جا کەراش خەیرە هەر وەی نەکەرایچش هەر وەی.
ئەر بە کورتی پێناسەو عیشقی کەرو: عیشق ئاویرێن گېریش سۆچنۆت، نەگېریش یارەکېت سۆچنۆ.
عیشق چیوێ نییا بە ڕېژەیی بۊ، ئاویرێ کز نییا تاکو تاوی گېریشو نە سۆچنۆت، یاگې تەرۆ تەنانەت ئانەیچ نییا کە ڕېژەیچ نەبۊ پېسەو ئانەی من یان خوێنەوارنا یان نەخوێنەوار، بەڵکو کەوتەنا حاڵەتێ ئەر خوێنەوار بوو سۆچوو، ئەر بوونیچم بۊ مەبۊ خوێنەوار بوو.
حاڵەتە عیشقیەکە ئینەن هەر کات ئا چیوەت بی وېت نەیەنی کە وێچت بېیەی ئاڵ نیا.
ئەر وەشەویسیەکە بی تۊ نییەنی و دوورکەوتەیۆکە ڕوە مڎۆ، ئەریچ تۊ بېیەی و نزیک بېیەی وەشەویسیەکە نیا.
دکتۆر عیرفان کۆبېیەوێنە واتش:
تا عیشق نەبۊ ژەنی مەبۊ، کە ژەنیچ بېیە عیشق مەبۊ
حەل و ئینەی ئانەن کە عاشق و مەعشوق با بەیۆ، چێنە پەی ئانەی یاومێشەنە ڕوونش کەرووە.
دلې عیشقینە من بوو بە تۊ هەرکات تۊم بېیەی وېم هەنا،
وە تۊیچ بی بە من هەرکات من بییا تۊم هەنی.
واتە ئەلف بۊ بە با وە بایچ بۊ بە ئەلف. کە واچی ئەلف یانی بایچ کە واتت با یانی ئەلفیچ.
ئینە جیاوازا چانەی واچی ئەلف یەکسانا بە با.
ئیسە ئەر گېڵمێ پەی بەیتەکې: نە تۊ کەردت خەیر: دلې وەشەویسیەکەو تۊنە ئانەی هەن مننا تۊیچ منت نەکەرد بە خەیرە.
نە منیچ خەیراتێ: دلې وەشەویسیەکەو منیچەنە ئانەی هەن تۊنی منیچ ئی خەیراتەمە نەکەرد.
جا پەی ئانەی وەشەویسیەکە نەبۊ بە خەیرە هەر دوویشا وېشا کەرد قوربانەو وەشەویسیەکەیشا و پېسەو خەیرو خەیراتی بەخشیېوەو خوا هەر یۊشا وستش وڵاتێ.
کە ماچۊیچ هەر یۆما کەوتەن وڵاتێ، ماناو ئانەی نییا کە جە ڕوەو یاگېو ژیوایۆ جە یۊی دوورێ کەوتێباوە، بەڵکو گومێ با، ئاڎێ گومێ باو وەشەویسیەکە مەنۆوە، وەشەویسیەکە دلې وېشەنە بە گوم بېیەی مازۆشاوە. وپەوکای تاکە چارەسەر عیشقەنە گووم بېیەین.
کەوتەنۆ بەینما حەوت کەش و حەوت کۆ
مەر واکەی شەماڵ من یاونۆ بە تۊ.
میقداد محەمەد ئەمین.[1]