- هەمەرێکی‌ داعش کە خۆکوژێکی‌ تێدابوو بە خاڵێکی‌ پشکنینی‌ پێشمەرگە لە گوندی عالییە ڕەشی سەر بە قەزای‌ قەرەقوش تەقییەوە و چەند بریندارێک و شەهیدێکی‌ پێشمەرگەی‌ لێکەوتەوە.
- شەڕ و پێکدان لە نێوان داعش و پێشمەرگە لە گوندەکانی‌ سەر بە ناحیەی‌ گوێر دەستیپێکردوەتەوە و داعش تێکشکاوە و پێشمەرگە لە پێشڕەوی‌ دایە.
- هێزەکانی پێشمەرگەی کوردستان لەناوچەکانی حەی تەحریرو شەلالەت لە#موسڵ# توانیان بەسەر چەکدارانی داعش سەرکەوتن تۆمار بکەن‌.
- ئەنجومەنی ئاسایشی نێودەوڵەتی ئیدانەی توندی پەلاماری چەکدارەکانی داعش بۆ سەر قەزای شنگال و ناوچەکانی دیکەی باکوری عیراق دەکات و بەپێویستی دەزانێت هەموو ئەوانە سزا بدرێن کە بەرپرسن لە تاوانی دژ بەمرۆڤایەتی.
- لە کاتژمێر چواری بەرەبەیانی ئەمڕۆ، چەکدارانی داعش هێرشیان کردوەتە سەر خاڵەکانی پیشمەرگە لە گوندی عەلی ڕەشی سەر بناحیەی بەرتلە، پێشمەرگەش بەرپەرچی هێرشەکەیان داوەتەوە، لە نزیک بەنداوی موسڵیش شەڕ بەردەوامە.
- سەرچاوەیەک لە یەکینەکانی پاراستنی گەل (یەپەگە) ڕایگەیاند، هێزێکیان بەناوی یەکینەی بەرخۆدانی شنگال پێکهێناوە، کە لە گەنجانی ئێزدی پێکهاتووەو لە لایەن ڕۆژئاوای کوردستانەوە چەکیان پێدراوەو ئامانجیان پاککردنەوەی شنگالە لە چەکدارانی داعش.
- هێزەکانی پێشمەرگەی کوردستان لە نزیک موسڵ دوو ئەمیری گەورەی داعش کە یەکێکیان بەرپرسی تەقاندنەوەی مەزارە ئاینیەکانە دەکوژن و سەرچاوەکانی ناو پێشمەرگەش ڕایدەگەیەنن، نەخۆشخانەکانی موسڵ پڕبوون لە برینداری داعش.
- ڕێگایەک بۆ ئاوارەکانی چیای شەنگال کراوەتەوە و لەئێستادا هێزەکانی پیشمەرگە سەرقاڵی دەربازکردنیانن بەرەو سنوری‌ سوریا.
- چەکدارەکانی دەوڵەتی ئیسلامی (داعش) ناحیەی‌ گوێر-یان داگیرکرد.
- بەپێی هەندێک سەرچاوە، پێشمەرگەکانی #پارتی دیموکراتی کوردستان# PDK لەناحیەی گوێر و قەزای مەخموور و گوندەکانی دەوروبەری پاشەکشەدەکەن و ئەمەش ئاڵۆزیەکی زۆری لە و ناوچەیە دروست کردووە و هاوڵاتیانیش ئاوارەدەبن.

جارێکی تر بانگی هێزە سیاسیەکان و گەلی کورد بەگشتی دەکەین، هەرچی زووە هێزی پاراستنی نەتەوەیی هاوبەش سازبکرێ. دوا بەدوای هێرشی داگیرکەری چەتەکانی داعش بۆ سەر شنگال، دیسانەوە گرنگی و زەروریەتی نەتەوەیی لەژێر چەتری ئەو یەکیێتیەدا، سازدانی هێزی پاراستنی هاوبەشی نەتەوەیی سەرهەڵدەدات. ئەم پرسە بە شێوەیەک کە پەلەی لێبکرێ بۆهەمان ئەو پێویستیە کەوتە نێو ڕۆژەڤی ئێمەی کوردەوە.
لە و سەروبەندەدا ئاشکرابوو کە لەو شەڕە گەورەیەدا، گەلی کورد و کوردستان ئامانجێکی سەرەکیە تێیدا. ئەزانرێ کە ئەوهێرشانەی پێشووتر، بە ئامانجی لەناوبردنی شۆڕشی ڕۆژاوای کوردستان لە سەرێکانی پێکهات. هێرشەکەی تریان بە پلانکراوی دوای داگیرکردنی موسڵ لە دژی کۆبانی بە ئەنجامگەیێنرا. ئەمڕۆش، لە دژی شنگال و دەستکەوتەکانی گەلی کورد لە باشوری کوردستان لە هێرشکردندان و هەردێ و هێرشەکانیان بەرفراوان و دژوارتر دەبن. پێویستە کورد، پارتە کوردیەکان و ڕۆناکبیرانی کورد. چەتەکانی داعش، وەکو کۆمەڵێکی توندڕەوی ئاینی و خەیاڵی سەیر نەکەن و واش بە بچوکی وەک هێزێکی گوزەر نەنرخێنن. داعش دەرەنجامی ستراتیژیەتێکی نەگریسی چەپەڵە لە دژی هەموو گەلانی ڕۆژهەڵاتی ناوەڕاست لەو گەمەیە گەورەیەدان. هەر بۆیە چەتەکانی داعش، بە بلانڕێژی و پرۆگرامی توکمەو ئامانجدار دەجووڵێرێ و بەکاردەهێنرێن.
پێش چەند ڕۆژێک، میتی دەوڵەتی تورکیا ڕایگەیاند، کە; شنگال بووەتە قەندیلی دووەهەم;. هەر دوای ئەو ڕاگەیێنراوەی دەزگای;میت; بە چەند ڕۆژێک چەتەکانی داعش هێرشیان بۆ سەر شنگال هێنا. دوابەدوای هەوڵی بەشداری YPG و YPJ لە ناوچەکا، هێزە لەشکریەکانی کورد بە گشتی لە یەک سەنگەردا کۆبوونەوە و لوولەی تفەنگەکانیان ئاراستەی داعشیەکان کرد.
ئەمڕۆ، هێرشی چەتەکانی داعش لە سەر سنووری باشوری کوردستان لە ڕەبیعە، حەسەکە تاوکو دەگاتە شنگال بەرفراوانتر بوون. ئەمە وا دەردەکەوێ کەرۆژئاوا، باشور و بەگشتی تەواوی پارچەکانی کوردستان و هەموو دەستکەوتەکانی گەلانی کوردستان، نرخ و پیرۆزیەکانی گەلی کورد و ئاشوری-سریانی- کلدانی، ئەرمەنی، تورکمان، عەرەب لەژێر مەترسیدان. بۆ ئەم مەبەستە ئێمە جارێکی تر بانگی هێزە سیاسی و تەواوی گەلی کورد دەکەین کە یەکێتی نەتەوەیی سازبکەن و لەژێر چەتری ئەو یەکیێتیەدا هێزگەلی پاراستنی نەتەوەیی هاوبەش و هەماهەنگ وەک پێویستیەکی ژیانی هەرچی زوووە سازبدرێ.
ئێمە لە کۆنگرەی نەتەوەیی کوردستان – KNK، بەرخۆدان و تێکۆشانی خەڵکی شنگال وهەلوێستی لاوان و گەنجانی کورد کە لە هەر چوارپارچەی کوردستان، ئەوانەی کە دەنگیان بەرزدەکەنەوە کە فریای شنگال بکەون، سڵاو دەکەین. دووبارە ئێمە لە کۆنگرەی نەتەوەیی کوردستان – KNK، بانگی هێزە سیاسەکان وتێکڕای پێشەنگانی گەلی کورد دەکەین هەرچی زووە یەکڕیزی خۆمان سازبدەین و بۆ پاراستنی نرخ و بەها و پیرۆزیەکانی گەلی کورد بەگشتی، شان بەشانی یەکتری و بەیەک دەنگ و یەک ستراتیژی لە دژی دوژمنانمان تێبکۆشین.
کۆنسەی بەڕێوەبەری کۆنگرەی نەتەوەیی کوردستان – KNK

پەیامێک بۆ گەلی کوردستان

گەلی خۆشەویست و خۆڕاگری کوردستان دڵنیادەکەینەوە کە هێزی پێشمەرگەی کوردستان لەپێشڕەویدایە لە بەرەی شنگالدا، هەروەها لەبەرەی جەلەولا و مەخمووردا چەکدارە تیرۆریستییەکانی داعشی تێکشکاندوون.
حکومەتی هەرێمی کوردستان بە باوەڕبوون بە هێزی پێشمەرگەی کوردستان بەڵێندەداتە هەموو گەلی کوردستان کە ڕێگە نادات تیرۆریستان خاکی پیرۆزی کوردستان پیس بکەن و، پێشکەوتنی ژیان لە کوردستان ڕابگرن.
داوا لە خەڵکی کوردستان دەکەین کە بەهیچ شێوەیەک دڵەڕاوکێ نەیانگرێت و، بە ئارامی لە شوێنەکانی خۆیان بمێننەوە و درێژە بە کار و ژیانی ئاسایی خۆیان بدەن.
بەڵێندەدەینە گەلی کوردستان، کە بە دەستێکی پۆڵاین لە تیرۆریستان دەدەین و، ئەو مەترسییەی لەسەر گەلی کوردستان و ناوچەکەش هەیە لادەدەین. هەموومان دەبێ باوەڕمان بە پێشمەرگە هەبێت و پشتیوانی پێشمەرگە بکەین.
داوا لە هەموو خەڵکی کوردستان و گەنجانی کوردستان دەکەین کە هەمیشە ورەبەرزبن، دەبێ هەموومان باوەڕمان بە دۆزی ڕەوای خۆمان هەبێت، ئێمە ئێستا بەرگریی لە خاکی پیرۆزی کوردستان دەکەین لە بەرامبەر هێزێکی تیرۆریستی داگیرکەردا، ئەوەش ئەوپەڕی ورە بەرزی پێویستە، بەتایبەتیش کە تیرۆریستان لەبەر زەبری پێشمەرگە کەوتوونەتە پەلەڤاژەی لەنێوچوونەوە.
بۆیەش داوا لە هەموو خەڵکی کوردستان دەکەین کە ورەبەرز و ئارام بن.

نێچیرڤان بارزانی
سەرۆکی ئەنجوومەنی وەزیرانی هەرێمی کوردستان
06-08-2014