لەسەر کەیسی تیرۆرکردنی کاوە گەرمیانی سەنتەری گەرمیان بۆ ڕاپرسی ئەنجامی ڕاپرسیەکی ڕاگەیاند و بەپێی ناوەرۆکەکەی 74%ە بەشداربوان پێان وایە دەستێوەردان لەکەیسەکەدا هەیە.
ئاودێر محەمەد، گەرمیان: ئەنجامی ڕاپرسییەکە ئەمڕۆ شەممە لەلایەن بەرپرسی سەنتەرەکە، چالاک نەجم، لەمیانەی کۆنگرەیەکی ڕۆژنامەوانیدا خوێندرایەوە و ڕایگەیاند، ڕاپرسیەکە لە 1/4 دەستیپێکردوە و تا ئەمڕۆ 1/11 بەردەوام بوە و له و ماوەیەدا 300 فۆرمیان دابەشکردوە و 293 فۆرمیان بۆگەڕاوەتەوه و 7 فۆرمی سوتاوە.
وتیشی، 74%ی بەشداربوان پێیانوایە دەستوەردانی نایاسایی له و کەیسە هەیه و هەوڵ هەیە بۆ بەلارێلابردن و ئاڵۆزکردنی کەیسەکە، لە 82،3%ی بەشداربوانیش پێیانوایە دەسەڵاتی دادوەری و جێبەجێکردن جێی متمانە نین.
چالاک نەجم، ئاشکراشیکرد، لە 77،8% بەشداربوان لەگەڵ ئەون کە دەبوو ئه و تیرۆرە لەسەرەتاوە بەتیرۆری سیاسی مامەڵەی لەگەڵ بکرایە.
دواپرسیاریش کە لەراپرسیەکە خراوەتەرو ئایە تاچەند گەشبینن بەدۆزینەوەی بکوژی ڕاستەقینەی کاوە گەرمیانی، لە 87،2%ی بەشداربوان دەڵێن گەشبین نین بەدۆزینەوەی بکوژو بکەری ڕاستەقینەی تیرۆکردنی کاوە گەرمیانی.
- 11-01-2014

ئاگاداری ڕای گشتی و کەناڵەکانی ڕاگەیاندن دەکەین کە گروپەکەمان چالاکییەکانی بۆ ئەم هەفتەیە ڕادەگرێت بەهۆی سەرقاڵبوون بەئامادەکارییەکانی چلەی ماتەمینی شەهیدی قەڵەم کاوە گەرمیانی کە بڕیارە ڕۆژی 15ی کانونی دووەم لەشاری کەلار بەڕێوەبچێت.

لەهەمانکاتدا گروپەکەمان پێشوازی لە هەنگاوی چونی بەرپرسێکی باڵای یەکێتی نیشتمانی کوردستان دەکات بۆ بەردەم دادگا و لێرەوە داوادەکەین سەرجەم داواکراوانی تری ئەم کەیسه و کەیسەکانی پێشوی وەک 17ی شوبات و شەهیدان سەردەشت عوسمان و سۆرانی مامە حەمە عەبدولسەتار شەریف ڕاپێچی بەردەم دادگا بکرێن.

هەروەها داواکارین ئەم هەنگاوە ببێتە سەرەتایەک بۆ نەهێشتن و لێسەندنەوەی ئەو حەسانە ناشەرعییەی بەناوی یاسا و ڕاسپاردەوە بەخشراوەتە بەرپرسانی باڵای حکومی و حزبی.

گروپی بەدواداچونی کەیسی شەهید کاوە گەرمیانی
7\1\2014

لەکاتێکدا، هێشتا خوێنی هەردوو ڕۆژنامەنووس سۆرانی مامەحەمە و سەردەشت عوسمان وشک نەبونەتەوە و هەموو لایەک چاوەڕێی ئاشکرا کردنی ئەنجامدەرانی ئەو دوو تیرۆرە بووین، کەچی جارێکی تر، بە تەحەدای دەزگا ئەمنی و ئیدارییەکانی ئەم وڵاتەوە، خوێنی ڕۆژنامەنووسێکی تر حەڵاڵ ئەکرێت و بە ئاشکرا تیرۆر ئەکرێت..
ئێمەی بەشێک لە ڕۆژنامەنووسان و چالاکوانانی مەدەنی شاری کفری، لەگەڵ بەتوندی ئیدانەکردنی ئەو کردە نامرۆڤانە و ناشەریفانەی تیرۆرکردنی هاوڕێ و هاوپیشەمان (کاوە گەرمیانی)دا، کە بە بەرچاوی دایکییەوە و لەناو ماڵەکەی خۆیدا دەستی ڕەشی شەمشەمە کوێرانی دەگاتێ و شەهید دەکرێت، ئیدارەی گەرمیان و دەزگاکانی ئاسایش لە گەرمیاندا ئەخەینە بەردەم بەرپرسیارێتی دۆزینەوەی بەپەلەی ئەنجامدەرانی ئەو کارەوە.
دادگاکانی گەرمیان و داواکاری گشتیش نابێت بێ دەربەست بن لەم تاوانەدا و بێدەنگی هەڵبژێرن، بەڵکو پێویستە ئەو سکاڵا و کەیسانەی ڕۆژنامەنووسی تیرۆرکراو کە ئێستاش لە دادگایە و هەڕەشە لێکردنەکانی پێشتری، بکرێن بە بنەمای لێکۆڵینەوە..
داوا لە ڕۆژنامەنووسان و ڕۆشنبیران و هەموو هاووڵاتیانی هەر ناوچەیەکی کوردستان و دەرەوەی کوردستانیش ئەکەین، هاودەنگی خۆیان بە چالاکی جۆراوجۆری مەدەنی بخەنە ڕوو و هەموو لایەک ڕوو لە کاربەدەستانی ئەم وڵاتە بکات، کە هەرچی زووە، ئەو کەسانەی دەستیان چووە خوێنی کاوە گەرمیانی، بدۆزرێنەوە و بخرێنە بەردەم حوکمی قانون، چونکە ئەگەر ئەم کەیسە پەردەپۆش بکرێت، هیچ ڕۆژنامەنووس و قەڵەم بەدەستێکی تر دڵنیا نییە لەوەی لەبەرامبەر دەربڕینی هەر وشەیەکیدا، فیشەکێکی پێوە نەنرێت.
بە ئیمزای:
1-سامان کەریم
2-هێمن عەدنان
3-سەڵاح محەمەد
4-هەرێم جاف
5-ئیحسان مەلا فوئاد
6-عەلی فوئاد
7-خالید عەبدولکەریم
8-هونەر عەدنان
9-شوان جەلال
10-ڕۆڤان سەروەت
11-فاتیح سەلام
12-ڕفعەت محەمەد
13-تانیا سەعید
14-دیار جەمال
کفری
6-12-2013

بەناوی خودای گەورە
بنەماڵەی شەهید کاوە گەرمیانی...
رۆژنامەنووسان و نوسەرانی بەرێز...
بەناوی خۆم و پارێزگای سلێمانییەوە، بەگەرمی سەرەخۆشی لە هەموو لایەکتان دەکەم بەبۆنەی گیان لەدەستدانی کاکە کاوەی جوانە مەرگ و خۆم بە هاوبەشی خەمتان دەزانم و بەتوندی ئه و کارە تیرۆریستیە مەحکوم و شەرمەزار دەکەم.
یەکێک لە شانازی و دەستکەوتە گەورەکانی ئێمە لە پارێزگای سلێمانیدا ئازادی میدیا و ئازادی ڕادەربڕینە، هەموو لایەک دڵنیا دەکەینەوە ڕێگە نادەین هیچ دەستێکی ناحەز و ڕەش ئه و شانازیی و دەست کەوتەمان لێ بستنێتەوە یان لەکەداری بکات.
تیرۆرکردنی شەهید کاوە، بەهەوڵێک دەزانین بۆ لەکەدارکردنی حکومرانی خۆماڵی و دەستکەوتە دیموکراتی و نیشتیمانییەکان و پێمان وایە ئه و هەوڵە دەست درێژی کردنە بۆ سەر حکومەتی هەرێم و سەروەرییەکانمان، بۆیە هەموو هەوڵێک دەخەینە گەڕ بۆ دۆزینەوه و بە سزا گەیاندنی ئەنجامدەرانی ئه و تاوانە قێزەونە.
دووبارە هاوخەمی خۆم بۆ بەهەموو لایەک ڕادەگەیەنم و لەخوای گەورە داواکارم کاکە کاوە بە بەهەشتی بەرینی خۆی شاد بکات و پشتیوانمان بێت لە دۆزینەوەی تاوانباران.
بەهرۆز محەمەد ساڵح
پارێزگاری سلێمانی
08-12-2013

بەپی ئەو هەوالانەی بەدەستی فیدراسیۆنی سەراسەری پەنابەرانی عێراقی گەیشتوە، کاوە محەمەد ئەحمەد ناسراو بە کاوە گەرمیانی ڕۆژنامەنووس و سەرنوسەری گۆڤاری ڕایەڵ و پەیامنێری ڕۆژنامەی ئاوینە وسایتی ئاوینە نیوز ئێوارەی پینج شەمە 5-12 لە لایەن چەند چەکدارێکەوە لەبەردەرگای ماڵەکەی خۆی بە پێش چاوی دایکیەوە بەشێوەیەکی ئەوپەری دڕندانە لە گەڕەکی (سەرکەوتن) قەزای کەلار تیرۆر دەکرێت.
تیرۆری کاوە گەرمیانی ئایندەی ئازادی لەژیر سایەی ئەم دەسەڵاتەدا مافیا و میلیشیایەدا بە تەواوی ڕۆشنکردەوە. کە لەماوەی 22 ساڵی ڕابردوودا و لە ژیر سایەی دەسەڵاتی یەکیتی و پارتیدا، چەندین نەیاری سیاسی و ڕۆژنامەنوسان وهەڵسوراوانی کۆمۆنیست وچەپ تیرۆر کراون وەیان ڕفیندراون وئیهانەتو سوکایەتیان پێکراوە، زیاتر لەمانەش وەلامی خواست و داوا ڕەواو بەرهەقەکانی خەڵکی کوردستان هەمیشە بە زەبری چەک داوەتەو. تاوانی ڕۆژنامەنوسان وهەڵسوراوانی سیاسی ئەوەیە ئاستەنگی لەبەردەم ڕاوڕوت و گەندەڵی و زۆڵم ستەم وبەتاڵانبردنی سەروەت سامانی کۆمەڵگادا دروست دەکەن.
تیرۆری کاوە گەرمیانی تیرۆری هەموو دەنگێکی ئازادە لە کوردستاندا. تیرۆری قەڵەمە ئازاو بوێرەکانە، هێرشە بۆ سەر سەرجەم مافە مەدەنی و ئازادی و ئینسانیەکانی خەڵکی کوردستان، وەڵامی دەستەو تاقمی میلیشایاکانی ئەو دەسەڵاتەیە بەو نارەزایەتیانەی بەرامبەر زوڵمو ستەم و ناعەدالەتی کۆمەلایەتیەی لەکوردستاندا بەریوەی دەبەن. پیویستە بە ناڕەزایەتی بەرینی جەماوەی وەلام وەرگرێتەوە، ئازادیخوازان و ئینسان دۆستانی دنیای لێ ئاگادار بکریتەوە تا ئەم پیشلکاریانە کۆتای پێبیت.
فیدراسیۆنی سەراسەری پەنابەرانی عێراقی سەرباری بە توندی ئیدانەکردنی تیرۆری کاوە گەرمیانی، دەسەڵاتدارانی کوردستان و دەزگا ئەمنیەکانی گەرمیان و حکومەتی هەرێمی کوردستان بە پەرپرس دەزانێت لە دەستبەجێ دۆزینەوەی تاوانباران و گەیاندیان بە دادگایەکی ئاشکرا و عادلانە.
فیدراسیۆنی سەراسەری پەنابەرانی عێراقی لەسەر ئەم کردەوە نامرۆڤانەیە تەواوی ڕێکخراوەکانی مافی مرۆڤو وناوەندە نیودەولەتیەکان لە ئاستی جیهاندا ئاگادار دەکاتەوەو کەیسی کاوە دەکاتە کەیسێکی گرنگ لە ساڵ ڕۆژی جیهانی مافی مرۆڤدا.
ئێمە بەناوی ئەندامان و هەڵسوراوانی ڕێکخراوەکەمان ئەوپەری پرسەو سەرەخۆشی خۆمان ئاراستەی کەسوکارو هاوریان و دۆستان وهاوپیشەو هاوکارانی کاوەگەرمیانی دەکەین و لەم پرسەدا هاوخەم وهاودەنگتانیین.
فیدراسیۆنی سەراسەری پەنابەرانی عێراقی
6-12-2013

کۆمیتەی محەلی گەرمیانی حزبی شیوعی کوردستان ئیدانەی تیرۆرکردنی کاوە گەرمیانی دەکات
بەناوی کۆمیتەی محەلی گەرمیانی حزبی شیوعی کوردستانەوە ئیدانەی تیرۆرکردنی ڕۆژنامەنووسی چالاک و ئەندامی حزب کاوە گەرمیانی دەکەین کە هەر ئێستا لە لایەن دەستێکی ڕەشەوە تیرۆرکرا، کاوە گەرمیانی پەیامنێری ڕادیۆی ئازادیە لەگەرمیان و هاوکات سەرنووسەری گۆڤاری ڕایەڵە، ئێمە لە کۆمیتەی محەلی گەرمیانی حزبی شیوعی کوردستان وێڕای ئیدانەکردنی تیرۆرکردنی هاوڕێ کاوە، داوا لەلایەنە پەیوەندیدارەکان دەکەین لێکۆڵینەوەی وورد لە ڕووداوەکە بکەن و تاوانباران بەزووترین کات بدۆزرێنەوەو ڕاپێچی بەردەم دادگا بکرێن.

کۆمیتەی محەلی گەرمیان
حزبی شیوعی کوردستان
05-12-2013

[1]

ئەنجومەنی وەزیرانی هەرێمی کوردستان بە فەرمانی ژمارە 11507 بڕیاری پێکهێنانی لیژنەیەکی هەماهەنگی و بەدواداچوونی دا بۆ گەڕان بەدوای ڕاستییەکان لە کەیسی کوشتنی ڕۆژنامەنووس کاوە ئەحمەد گەرمیانی.

لیژنەکە لەم لایەنانەدا پێکهێنراون:

1- نەورۆز عومەر محێدین ڕاوێژکاری یاسایی لە سەرۆکایەتی ئەنجومەنی وەزیران سەرۆک
2- نوێنەری وەزارەتی ناوخۆ ئەندام
3- نوێنەری دەزگای ئاسایشی هەرێمی کوردستان ئەندام
4- نوێنەری ئیدارەی گەرمیان ئەندام
5- نوێنەری سەندیکای ڕۆژنامەنووسانی کوردستان ئەندام
6- نوێنەری سەنتەری میترۆ بۆ دادکۆکی لە مافی ڕۆژنامەنووسان ئەندام


ئەرکەکانی لیژنەی پێکهێنراو بەپێی فەرمانەکە بریتییە لە:

1 هەماهەنگی و هاوکاریکردنی دادگای لێکۆڵینەوە و داواکاری گشتی و لایەنە قەزائییەکان بۆ گەیشتن بە ڕاستییەکان و لە چوارچێوەی یاسای (قانون اصول المحاکمات الجزائیە) ژمارە 23ی ساڵی 1971.
2- کارئاسانی و بەدواداچوونی جێبەجێکردنی بڕیارەکانی دادگا و داواکاری گشتی لەبارەی کەیسەکەوە لە وەزارەت و فەرمانگە و دەزگا تەنفیزییەکانی سەر بە دەسەڵاتی جێبەجێکردن بەبێ ئەوەی هیچ تەدەخولێک لە دەسەڵاتەکانی دادگا و لاینە قەزائییەکان بکرێت.
3- وەزارەتی ناوخۆ ئەفسەر و پۆلیسی لێکۆڵەرەوەی بەئەزموون و شارەزا دابین دەکات بۆ لێکۆڵینەوە لە کەیسەکە.
4- دانانی سەرۆکی فەرمانگەی داواکاری گشتی لە گەرمیان وەک چاودێر لە لیژنەکە لە چوارچێوەی یاسای داواکاری گشتی ژمارە 159ی ساڵی 1979.
5- وەزارەت و لایەنە پەیوەندیدارەکان ئەم فەرمانە جێبەجێ دەکەن.

- سەرجەم ڕێکخراوە ئەنتەرناسیۆنالەکانی بەرگریکار لە مافی مرۆڤ و ئازادی ڕادەربڕین و یەکێتی ئەوروپا لە تیرۆرکردنی کاوە گەرمیانی ئاگادار ئەکەینەوە
بۆ بەرێزان:
- پەرلەمانی یەکێتی ئەوروپا - کۆمیتەی مافەکانی مرۆڤ
- پەرلەمانی یەکێتی ئەوروپا - نوسینگەی گەشەپێدانی دیموکراسی پەرلەمانی
- پەرلەمانی یەکێتی ئەوروپا – کۆمیتەی گەشەپێدانی یاسا لەعێراق
- سەرۆکی نێردەی پەرلەمانی یەکێتی ئەوروپا لە عێراق - ستروان ستیڤنسن
- جێگری سەرۆکی نێردەی پەرلەمانی یەکێتی ئەوروپا لە عێراق - ئەستێر دێ لانگە
- تەواوی ئەندامان و کارگێڕانی نێردەی پەرلەمانی یەکێتی ئەوروپا لە عێراق (19 کەسایەتی لە فراکسیۆنە جیاوازەکانی پەرلەمان)
- یەکێتی ئەوروپا – کۆمیتەی سەروەری یاسا EUJUST LEX
- یەکێتی ئەوروپا – نوسینگەی کاروباری دەرەوە
- وەزارەتی دەرەوەی حکومەتی فیدراڵی بەلجیکا
- ئیمینستی ئینتەرناشیۆناڵ
- هیومان ڕایتس ۆچ
- پەیامنێرانی بێ سنور
- کۆمیتەی بەرگری لە ڕۆژنامەنوسان CPJ
بەرێزان ئاگادارتان ئەکەینەوە، کاوە محەمەد ئەحمەد ناسراو بە (کاوە گەرمیانی) دوێنێ شەو هاتە ڕیزی قوربانیەکانی ئازادی ڕادەربڕینەوە. گەرمیانی شەوی 5 ی 12 ی 2013 لە لایەن چەند تاوانبارێکەوە لەبەر چاوی دایکی کوژرا.
بەو کردارەش لاپەرەیەکی تری ڕەش لە مێژوی هەرێمی کوردستان دژ بەو دەنگە ئازادانە تۆمار کرا. ئەو قوربانیانەی کە خەڵکی کوردستان ناویان ناون شەهیدانی قەلەم.
هەرێمی کوردستانی ئێراق کە لە ساڵی 1991 وە لە ژێر کۆنترۆڵی حکومەتی ئێراقی سەردەمی سەدام حوسێن و پاش ئەو نەماوە و ئازادیەکی ڕەهای بە ناوی هەرێمی فیدراڵەوە هەیە. ئەو هەرێمە لە لایەن دوو پارتی سیاسیەوە کە بنەماڵەکانیان پۆستە سەرەکیە سیاسی و ئاسایشیەکانیان هەیە بەڕێوە دەبرێت.
دەزگا ئەمنیەکان و بەرپرسانی ئەم هەرێمە مێژوویەکی پڕ خوێناویان لە کوشتن و زیندانیکردن و ڕاونان و ئازاری فیزیکی و دەم مردوکردن و سوکایەتی پیکردن وهەوڵی کڕینی ویژدانی ڕۆژنامەنوسان و دەنگە ئازادەکان هەیە.
راپۆرتەکان وهەواڵەکانی ڕێکخراوەکانی وەکو، پەیامنێرانی بێ سنور، ڕێکخراوی ئیمینستی ئەنتەرناشناڵ، هیومان ڕایتس ۆچ و کۆمیتەی بەرگری لە ڕۆژنامەنوسان CPJ و ڕێکخراوە مەدەنیەکانی ناو هەرێمی کوردستان لە ماوەی دەسەلاتی ئەو هەرێمەدا ئاوێنەی ڕوداوە تراژیدیاکانن بەرامبەر بە ڕۆژنامەنوسان.
بۆیە لەگەڵ بڵاوبونەوەی هەواڵی هەر دەستدرێژیەک بۆ سەر ڕۆژنامەنوسان پەنجەی گومان بەرەو دەزگا ئاسایشیە سەرکوتکەرەکانی دەسەڵاتی هەرێمی کوردستان ڕادەکێشرێت. ئەو دەزگایانە ئەگەر تاوانباری ڕاستەوخۆش نەبن و ئەنجامدەری تاوانەکان نەبن، ئەوا ڕێخۆشکەرو هاندەری تاوانن بەرامبەر بە ڕۆژنامەنوسان، لەبەرئەوەی لە دۆزینەوەی تاوانباران کەمتەرخەم و خەمسارد بون و خەمساردن. ئەگەر تاوانێکیش خۆیان ئەنجامدەری نەبن ئەوا ڕۆڵی تەماشاکەر دەبینن.
شێوازی تیرۆرکردنی کاوە گەرمیانی ئەوە دەخاتە ڕوو کە ئەکتێکی پلان بۆ دانراو بووە و بە ووردی جێبەجێ کراوە و بێ بنەما نیە کە پەنجەی گومان بۆ دەزگا ئاسایشیەکانی هەرێمی کوردستان ڕادەکێشرێت.
ڕێکخراوی کوردستان فۆروم لە بەلجیکا زۆر بە توندی ئیدانەی ئەو تاوانە دەکات و داواکارە بە زووترین کات ڕاستیەکان بخرینە ژیر تیشکەوە. بۆئەوەی کەیسی کاوە گەرمیانیش وەکو کەیسی ڕۆژنامەنووسان و چالاکانی تری تیرۆرکراو بەلاڕێدا نەبرێت، پێویستە بکوژانی ئەو ڕۆژنامەنوسە و هاوکارانیان و ئەو دەستانەی لە پشتی ئەو تاوانەوە بون ئاشکرا بکرێن و بدرێنە دادگا و سزای یاسایی خۆیان بەسەردا بدرێت.
ئیمە وەکو ڕێکخراوێکی مەدەنی کوردستانی لە بەلجیکا بە ئەرکی خۆمانی دەزانین سەرجەم دەزگاو کۆمیتە پەیوەستەکانی ناو یەکێتی ئەوروپا و حکومەتی بەلجیکی و ڕیکخراوە ئینتەرناسیۆناڵەکانی بەرگریکار لەمافەکانی مرۆڤ و ئازادیەکانی ڕادەربڕین لەو تاوانە ئاگادار بکەینەوەو داواتان لێ بکەین کە گوشار بخەنە سەر دەسەڵاتدارانی هەرێمی کوردستان بەو مەبەستەی کە ئەم تاوانەش وەکو تاوانەکانی تر پشتگوێ نەخرێت و بە خەمساردیەوە مامەڵەی لەگەڵدا نەکەن، بەڵکو تاوانبارانی ڕاستەقینە بدۆزنەوەو بەسزای یاسایی خۆیان بگەیەنن.
ڕێکخراوی کوردستان فۆروم بەلجیکا
6-12-2003 برۆکسل
بۆ پەیوەندی :
پێشرەو ئیسماعیل عارف
0032497894232
kurdistanforum@hotmail.com

پێشنیوەڕۆی ئەمڕۆ بەسەرپەرشتی هەڤاڵ کۆسرەت ڕەسول عەلی جێگری یەکەمی سکرتێری گشتی، مەکتەبی سیاسی لە سلێمانی کۆبووەوە.
لە کۆبوونەوەکەدا، دواکۆبوونەوەی هاوبەشی هەردوو وەفدی دانوستانی یەکێتی و پارتی تاووتوێکرا کە دوو ڕۆژ لەمەوبەر لە بارەی پێکهێنانی کابینەی نوێی حکومەتی هەرێم ئەنجام درابوو. مەکتەبی سیاسی لەو بارەوە تەئکیدی لەسەر هەڵوێستەکانی یەکێتی لەبارەی ئەو کەیسە کردەوەو کۆبوونەوە هاوبەشەکەشی بە کۆبوونەوەیەکی دۆستانەو جدی و ڕاشکاوانە هەڵسەنگاند و ڕاسپاردەی پێویستیشی لە چوارچێوەی بڕیاری ئەنجومەنی سەرکردایەتی یەکێتی بۆ پێکهێنانی کابینەی نوێ، دایە لیژنەی دانوستانی یەکێتی تا لەدرێژەی کۆبوونەوەکانیان لەگەڵ پارتی و لایەنەکانی تردا لەبەرچاو بگیرێن. هەروا کۆبوونەوە تەئکیدیشی کردەوە، کە یەکێتی ئیجابیانە مامەڵە لەگەڵ هەوڵەکانی پێکهێنانی کابینەی نوێی حکومەتی هەرێمدا ئەکات و لە ڕوانگەی هاوپەیمانی و دۆستایەتییەکانی و پەرۆشی بۆ یەکڕیزی نیشتمانی هاوکاری جدی پرۆسەی دانوستانەکان ئەبێ.
تەوەرێکی تری کۆبوونەوەکە، تایبەت بوو بە ڕووداوی تیرۆرکردنی ڕۆژنامەنووسی جوانەمەرگ کاوەگەرمیانی کە دوو ڕۆژ لەمەوبەر لە شاری کەلار شەهیدکرا. لەوبارەوە مەکتەبی سیاسی بە توندی ئیدانەی تیرۆرکردنی ڕۆژنامەنوسی جوانەمەرگی کرد و پرسەو سەرەخۆشی یەکێتی بۆ کەس وکارو هاوڕێ و هاوپیشەکانی ڕاگەیاند و تەواوی پشتیوانی خۆیشی لە پرۆسەی لێکۆڵینەوەو بەدواداچوون ڕاگەیاند، کە ئێستا لەلایەن لیژنەیەکی لێکۆڵینەوەی تایبەتەوە ئەنجام ئەدرێ کە بەبڕیاری حکومەتی هەرێم پێکهێنراوەو هەڤاڵ عیماد ئەحمەد جێگری سەرۆکی حکومەتی هەرێم لە نزیکەوە بەدواداچوونی بۆئەکا. هەر لەبارەی ئەو کەیسەوە مەکتەبی سیاسی
نیگەرانی خۆی سەبارەت بە چۆنیەتی بەدواداچوونی میدیایی هێندێ لە کەناڵ و سایت و پەیجەکانی تۆڕی کۆمەڵایەتی نیشاندا، کە بێ هیچ بنەمایەکی بەڵگەدار ڕووی تاوانەکە ئاراستەی یەکێتی و هێندێ لە هەڤاڵانی ئەکرێن و ئەو تاوانە بە سیاسی ئەکەن و ئاراستەی لێکۆڵینەوەکانیش ئەشێوێنن و بەلاڕێدا ئەیبەن. لەو بارەوە مەکتەبی سیاسی وێڕای تەئکید کردنەوە لەسەر سیاسەتی نەگۆڕی پشتیوانی کردنی یەکێتی سەبارەت بە ئازادی ڕادەبڕین و ئازادی میدیا و میدیاکاران لە چوارچێوەی یاسادا، سەرنجی ئەو میدیاو میدکارانەی بۆ ئەوە ڕاکێشا کە پابەندبن بە ئیتیک و پیشەیی بوونی کاری میدیایی، بە تایبەت سەبارەت بە کەیسی تاوانی لەو جۆرە. هاوکات تەئکیدیشی کردەوە کە یەکێتی مافی یاسایی بەرگریکردن لەخۆی لە بەرامبەر تۆمەتبارکردنی بێ بنەما و ناڕاست، بەرامبەر ئەو کەس و کەناڵانە ئەپارێزێ.
تەوەرێکی تری کۆبوونەوەکە، تایبەت بوو بە کەیسی ئەمنی کەرکووک و کەیسی هەڵبژاردنەکان لە ناوچەکانی کوردستان لە دەرەوەی هەرێم. لەوبارەوە مەکتەبی سیاسی، وێڕای پرسەو سەرخۆشی بۆ قوربانیانی کردەوە تیرۆریستییەکەی کەرکووک، دەستخۆشی لە هەموو دامەزراوە ئەمنیەکانی کەرکووک و هەرێم و هەروا لە هەموو ئەو لایەنانە کرد کە لە ڕووبەڕووبوونەوەی ئەو کردەوە تیرۆریستییە کرد و سوپاسی هاوکاری و پشتیوانی خەڵکی کەرکووکی کرد لە کاتی ڕووداوەکە. هاوکات مەکتەبی سیاسی پشتیوانی خۆی لە ئیدارەی کەرکووک و لایەنە ئەمنیەکانی تەئکید کردەوەو ستایشی پێشکەوتنی خزمەتگوزاری و ئاوەدانکردنەوەی شارەکەی کردو نیگەرانی قووڵی خۆیشی پیشاندا سەبارەت بەو شاڵاوەی لە ڕێی میدیاوە ئەکرێتە سەر پارێزگار و بەرپرسانی ئیداری و ئەمنی شارەکە، تەئکیدیشی کردەوە کە هاوئاهەنگی نێوان هێزە کوردستانییەکان لە کەرکووک و ناوچەکانی تری دەرەوەی هەرێم، مەرجێکی سەرەکی وگرنگ و پێویستی یەکڕیزییە، وەک چۆن هاریکاری و هاوئاهەنگی نێوان نەتەوەو ئاین و مەزهەب و لایەنە سیاسییەکانی تری کەرکووکیش پێویست و گرنگە.
هاوکات کۆبوونەوە بەدواداچوونی وردو هەمەلاینەی بۆ کەیسی هەڵبژاردنەکانی داهاتوو کرد لە کەرکووک و پارێزگاکانی تری دەرەوەی هەرێم وسیاسەتی خۆی لەمەڕ پەیڕەوکردنی یەک هەڵوێستی لایەنە کوردستانیەکان تەئکید کردەوە.
07-12-2013