رۆژی (30ی نیسانی 2014) هەڵبژاردنی ئەنجوومەنی نوێنەرانی ئیراق و ئەنجوومەنی پارێزگاکانی هەرێمی کوردستان بەڕێوەچوو، سەرکەوتووانەش ئەو پرۆسەیە کۆتایی هات ولە (19 و 22-05-2014) ئەنجامەکان ڕاگەیەنران، بەو بۆنەیەوە پیرۆزبایی لە ڕۆڵەکانی گەلەکەمان و پارت ولایەنە سیاسیەکان دەکەین.
ئەنجامدانی هەڵبژاردنەکان و پرۆسەی دەنگدان، وێرای هەوڵ و کۆششی لایەنە پەیوەندیدارەکان و بە ئامادەبوونی بەرپرسی ئۆفیسی نەتەوەیەکگرتووەکان لە هەرێم(یونامی)و کۆمکاری وڵاتانی عەرەبی و چەندین لایەن و ڕێکخراوی فەرمی و پیشەیی بیانی، بەشێوەیەکی ڕێکوپێک و شەفافانە و بە بەشداریکردنێکی بەرچاوی هاووڵاتیانی دەنگدەر بەرێوەچوو.
بێگومان ئەو پرۆسە دیموکراسیە وەک دەسکەوتێکی سیاسی، گرنگیی و تایبەتمەندیی و کاریگەری خۆی هەیە لەسەر بەهێزبوونی پێگەی هەرێمی کوردستان لە ئیراق وناوچەکەدا.
لەو ماوەیەی حوکمرانی هەرێمدا پرۆسەی دەنگدان و هەڵبژاردنی ئازادانە وەک مافێکی یاسایی دەستەبەرکراوە و بەمەش توانراوە پانتاییەکانی کاروچالاکی دیموکراسی بەرفراوانتر بکرێ و جەخت بکرێتەوە لەسەر تەبایی و برایەتی و پێکەوەژیانی برایانەی تاکەکانی نێو کۆمەڵگە و پێکهاتە و یەکەئیتنیەکان بە جیاوازی بیروباوەری ئایینی وئایینزاییانەوە، ئەمەش لە ژیانی سیاسیماندا بایەخی خۆی هەیەو پەیوەستە بە چارەنووسی گەلی کوردو ئایندەی هەرێمی کوردستانەوە.
ئێمە وەک پارتی دیموکراتی کوردستان وێرای پیرۆزبایی لە هاووڵاتیان و ڕۆڵە بەئەمەکەکانی گەلەکەمان دووپاتی دەکەینەوە کە هەمیشە لەگەڵ پرۆسەی دەنگدان و هەڵبژاردن داین بۆ چارەسەرکردنی کێشە سیاسیەکان و یەکلاکردنەوەی ململانەکان لەرێی سندووقەکانی هەڵبژاردنەوە و بەوپەڕی گیانی بەرپرسیاریەتیەوەش بەدەنگ ئەنجامەکانی هەڵبژاردنەکەوە دەچین و پەسەندی دەکەین و بەدەستکەوتێکی دیکەی گەلەکەمانی دادەنێین، گرنگترین پرسیش لەو قۆناخە هەستیارەدا سەرکەوتنی پرۆسەکەو زیاتر هەنگاونانە بۆ گەیشتن بە ئامانجە ڕەواکانمان.
لەو کاتەی کابینەی هەشتەم پێکدەهێنرێ و بەرەو قۆناخێکی تازە و گرنگ هەنگاو دەنێین پێویستە کارنامەی داهاتووشمان لەگەڵ ناوەند بەیەک دەنگ و سەنگ، ئاوا ڕێکبخەینەوە بە دانوستان و هەماهەنگی لەگەڵ کوتلە و لایەنە سیاسیە براوەکانی دیکەی ئیراق بۆ پێکهێنانی کابینەی نوێی حکومەتی ئیراقی فیدراڵ، کە لە خزمەت و سوودی هەرێم بێت و بۆ ئەوەی کوردستان ئاوەدانتر و ژیانی خەڵک باشتر بێت، لەپێناو یەکڕیزیی و سەقامگیریی سیاسی و چارەسەری یەکجارەکی کێشەکان بێت لەگەڵ بەغدا، ئەمەش بە داکۆکیکردن و سووربوون لەسەر بەدەستهێنانی ئیستیحقاقاتەکان و سەلماندن و سەندنەوەی تەواوی مافەکانمان بەپێی یاسا و دەستوور دێتەدی.
جێی خۆیەتی بەوبۆنەیەوە سوپاس و پێزانینمان ئاراستەی چین وتوێژەکانی گەلەکەمان و یەکبەیەکی هەڤاڵانمان بکەین لە کادیر و ئەندام و لایەنگر و دۆست و هاورێبازانمان و تەواوی دام و دەزگا و ئۆرگان و مەکتەب و کەناڵەجیاجیاکانی ڕاگەیاندنی پارتیمان، هەروەها قوتابیان و لاوان و ئافرەتان، کە گشتیان لەخۆبردووانە هەمیشە و بەردەوام خەمخۆرانە کاریان بۆ سەرخستنی ئەو پرۆسەیە کردووە و دەکەن، هەروەها ناوەندەکانی ڕێکخستن و ئۆفیسەکان و ڕەوەندی کوردی لە هەندەران کە ڕۆڵێکی کاریگەریان لە بەدەستهاتنی ئەو ئەنجامانە هەبوو، کە بە هەوڵ و کۆششی هەموو لایەک پتر لە یەک ملیۆن دەنگ دراوە بە کاندیدانمان ئەمەیش نیشانەی چەندبارە بەخشینەوەی متمانەیە بە پارتیمان و ڕێبازی بارزانی.
بێگومان سەرکەوتنی پارتیمان لەو هەڵبژاردنانەدا بەپلەی یەکەم و زیادبوونی دەنگەکانی، پێش هەرشتێک بۆ دڵسۆزی و هۆشیاری تەواوی گەلەکەمان بەچین وتوێژەکانیەوە و پێکهاتە ئایینی و ئایینزا جیاجیاکانەوە دەگەڕێتەوە، هەروەها بڕوابوونی پتەویان بە بەرنامە و ڕێبازی پارتیمان و جەنابی سەرۆک بارزانی و سەرکردایەتیەکەی، کە دڵنیاین لەوەی لە داهاتوودا زیاتر و باشتر ڕۆڵی شایستەی خۆیان لە مەیدانەکەدا دەگێڕن.
لێرەدا جێی خۆیەتی سوپاسی ماندوبوون و هەوڵەکانی دامودەزگا ئەمنیەکان لە پۆلیس و ئاسایش و پێشمەرگە قارەمانەکان بکەین، کە وەکو هەمیشە بوونە فاکتەری دیاری فەراهەمکردنی فەزایەکی ئەمین و لە بار بۆ پرۆسەی هەڵبژاردنەکان.
دوابەدوای ڕاگەیاندنی ئەنجامەکانی هەڵبژاردن لەلایەن کۆمسیۆنی باڵای سەربەخۆی هەڵبژاردنەکانەوە، ئێمە وەک پارتی دیموکراتی کوردستان، وێرای پابەند بوونمان بە ئەنجامەکان، نیگەرانی خۆمان سەبارەت بە ئەنجامەکانی هەڵبژاردنی ئەنجوومەنی نوێنەران ڕاگەیاندووە و پێشبینی کورسی زیاترمان کردووە لەوەی ڕاگەیاندراوە بەتایبەتی لە نەینەوا و هەولێر و پێشمان وایە چەند کەموکوڕیەک هەیە و لەئەستۆی لایەنی پەیوەندیدار دایە و پێویستە چارەسەر بکرێن و لەوبارەیەوەش تێبینیمان هەیە و داومانە بەکۆمسیۆنی باڵای سەربەخۆی هەڵبژاردنەکان و بەدواداچوونیشی بۆ دەکرێ.
جارێکی دیکە پیرۆزبایی ئەنجامدان و ڕاگەیاندنی ئەنجامەکانی هەڵبژاردنەکان و سەرکەوتنی پارتیمان ئاراستەی گەلەکەمان دەکەین... هەر سەرکەوتوو بن... مەکتەبی سیاسی
پارتی دیموکراتی کوردستان
22-05-2014