هێڤی خالید
وتەبێژی یەکێتی بەڵێندەرانی کوردستان ڕایدەگەیەنێت، نزیکەی 110هەزار کەس لە پارێزگای سلێمانی بێکارن کە پێشتر لە کەرتی تایبەت و بەڵێندەراندا کاریان کردووە، ئاماژە بەوەشدەکات، لە دوێنێوە هەموو کۆمپانیاکان هەڵمەتێکی گەورەیان کردۆتە سەر یەکێتی بەڵێندەرانی کوردستان و داوا دەکرێت خۆپیشاندانێکی گەورە ئەنجام بدرێت.
میران کامیل وتەبێژی یەکێتی بەڵێندەرانی کوردستان لە سلێمانی لەلێدوانێکی بۆ خەندان وتی: "دوای ئەوەی وەزارەتی پلاندانان و دارایی پارەی پڕۆژەکانیان وەستان، ئێمەش وەکو یەکێتی بەڵێندەران چەند نوسراوێکمان ئاڕاستەی ئەنجومەنی وەزیران و وەزارەتەکان کرد، کە وەستانی پڕۆژەکان کاریگەرییەکی خراپی دەبێت لەسەر دۆخی ئابوری ئەم وڵاتە".
وتیشی: "بەڵێندەر ئامادەبوو بەچەکی بێ پارە بەشێک لە کارەکانی تەواو بکات بەڵام ئەوەشیان وەستاندووە، ئەمەش لە کاتێکدایە پڕۆژەکانی پترۆڵ دۆلار بۆ ماوەیەی یەک ساڵە هیچ وەڵامێکی نییە و داخوازییەکانی بەڵێندەران ڕۆژ بەڕۆژ دوادەکەوێت".
ئاشکراشی کرد،" کە لە دوێنێوە هەموو کۆمپانیاکان هەڵمەتێکی گەورەیان کردۆتە سەر یەکێتی بەڵێندەرانی کوردستان و داوا دەکرێت خۆپیشاندانێکی گەورە ئەنجام بدرێت، هەر لەدوێنێشەوە نزیکەی 120 کۆمپانیا واژۆیان کۆکردۆتەوە".
ناوبراو ئاماژەی بەوەشکرد کە، لە ئێستادا چاوەڕوانی ئەوەین وەڵامێکی باشمان دەست بکەوێت و ڕۆژ بەڕۆژ واژۆکان زیاتر دەبێت، بۆیە داوا لە حکومەت دەکەین وەڵامێکی بەڵێندەران بدەنەوە و لەوە زیاتر داواکانمان فەرامۆش نەکرێت.
میران کامل وتەبێژی یەکێتی بەڵێندەران ڕاشیگەیاند کە، "نزیکەی 110هەزار کەس لە پارێزگای سلێمانی بێکارن کە پێشتر لە کەرتی تایبەت و بەڵێندەراندا کاریان کردووە، داوای وەڵامێکی جدی دەکرێت بۆ چارەسەر کردنی ئه و کێشەیە".
- 09-02-2015